National Voluntary Blood Donation Day pualin Serchhip-ah thisen pek pawimawhna zirho a ni

Rampum-a midangte tana a thlawna thisen pekna ni, National Voluntary Blood Donation Day pualin nimin khan Serchhip-ah thisen pek pawimawh zia inzirtirna neih a ni.
Serchhip Distroct Hospital Blood Bank, Association for Voluntary Blood Donation (AVBD) Serchhip Branch leh Govt. Serchhip College NSS Unit te tangkawp in Govt. Serchhip College Seminar Hall-a National Voluntary Blood Donation Day puala hun an buatsaih hi Govt. Serchhip College Principal K. Laldinpuii chuan khuallian nia hmanpuiin Govt. Serchhip College-ah thisen pek pawimawh zia leh HIV/AIDS laka inven dan tur inzirtirna buatsaih a ni chu lawmawm a tih thu a sawi a, an College NSS Unit te pawhin thisen pek kawngah theihtawp chhuahin kum 2019 hnu lamah tum 9 lai thisen pekna hun an buatsaih tawh thu leh kumin ah pawh tum hnih an buatsaih tawh thu a sawi a. Midangte tana thisen pe thei nih a pawimawh zia sawiin, Kristian te chuan Isua thisen zara chatuan nunna nei thei kan ni tih kan hriat angin, he lei-ah midang te tana nunna kan pek theihna a ni tih kan hriat a tul thu a sawi bawk a ni.


Govt. Serchhip College Principal chuan an College in NAAC Grade 'A' an hmuh hnuah hemi vawngnung reng tur leh a aia Grade tha nei tura hma an lak reng thu sawiin, Zirtawpni chawhnu apiangin Co-Curricular Activities hrang hrang an neih thin thu leh zirlaite tana hetiang inzirtirna hun buatsaih duh tan pawh an inhawng reng tih a sawi a. Tunhnaia MPSC in Combined Competitive Exam a buatsaih ah Serchhip atanga tling an awm lo chu zirlai ten tan lakna atan hmang se a duh thu pawh sawiin, Govt. Serchhip College-a Coaching Class an buatsaih thin chu Mizoram hmundang a mi te aia a that loh bikna a awm lo tih sawiin, hmang tangkai turin zirlaite chu a chah bawk.

AVBD Serchhip Branch President C. Zakunga kaihhruai he hunah hian Serchhip District Medical Superintendent Dr. ZD. Lalmuanawma chuan midang te tana thisen pek pawimawhna hrang hrangte sawiin, zirlai kalkhawmte chu midangte tana thisen pe turin a sawm a. AVBD Serchhip Branch Vice President Zonunsanga Kawlni pawhin damlo ten an mamawh hun apianga an mamawh ang thisen an hmuh theihna tura Blood Bank pawimawhna sawiin, mi tu te emaw tan bik ni lova thisen kan pek thu tlawmngaihna hlu tak a nih thu leh a petu ngei pawhin an mamawh leh theih a nih thu a sawi a. Govt. Serchhip College NSS-a Programme Officer C. Lalramliana pawhin thisen pek a hlauhawm loh thu sawiin, Mizo thalaite chuan vawi khat tal thisen pek kan tum thin a tul thu leh midangte tana thilpek hlu tak a nih thu a sawi bawk.

He hunah hian Govt. Serchhip College-a 1st Semester Zirlai te telin Serchhip Blood Bank Officer Dr. Lalnunhlima Khiangte chuan thisen pek chungchang leh hemi kaihhnawih a hriat tur pawimawh hrang hrangte a lem nen entirin a sawifiah bawk a ni.

Comments

Popular posts from this blog

Tukverh-a tlasual boral