National Games-ah Mizoram in Gold la

National Games 2022 neih mekah Mizoram chuan Gold Medal a la ve ta a, Inrinni khan Lalhumhimi chuan Judo (-52kg)-ah Gold Medal hi lain Mizoram in Medal pahnih a la ve ta a ni.

Zemabawk North nula, Lalhumhimi hian a match hmasa lamah Gujarat, Madhya Pradesh leh Haryana te chu Full Point hmangin a hneh vek a, Inrinni khan Final-ah Delhi aiawhtu nen an inhmachhawn a, Gold Medal inchuhna ah pawh hian chiang takin hnehna a chang a, Lalhumhimi hian tun hmain Senior National-ah Gld Medal pakhat leh Bronze Medal pathum a lo la tawh a. All India Police Meet-ah pawh Bronze Medal la tawh bawkin National Games-ah erawh a vawi khat khelhna a ni a, inelna a hmachhawn hmasak berah Mizoram tan Medal hlu tak a hlawh chhuak nghal a ni.

Sports Minister leh Mizoram Olympic Association (MOA) President ni bawk Robert Romawia Royte chuan Mizoram in Gold Medal a la chu lawmawm a tih thu sawiin, “Lalhumhimi'n Judo (-54kg) huanga National Games Gold Medal a la hi Mizo hnam tan a lawmawm takzet a ni. National Games hi National Championship a tithate inelna a ni a, a tel phak nih ringawt pawh a harsa. Chutiang a nih laia Gold Medal lai a la hi a ropui hle,” a ti a. “Mizoram in Incentive Scheme kan neih angin Gold Medal latu hi Rs 6,00,000 pek a ni dawn a, Bronze Medal latu Zakhuma pawh Scheme kan neih sa angin Rs 2,00,000 pek a ni bawk ang,” tiin Nakumah Goa-ah National Games a awm leh nghal dawn thu leh chumi atan chuan kan inbuatsaih leh nghal dawn thu Sports Minister chuan a sawi bawk.