Mizoten ram leh mipui kan nei; a enkawl tur sawrkar tha kan mamawh ber - Lalsawta

Mizoram Pradesh Congress Committee (MPCC) President Lalsawta chuan, “Mizoten ram kan nei, mipui kan nei bawk, chumi enkawl tur Sawrkar tha chu kan mamawh ber a ni,” a ti.

MPCC Elected Office Bearer-ten Mizoram District hrang hrang tlawhchhuah Programme an hman mekah khawchhak tlangdung fang mekin nimin khan Khawzawl-a Vantlang Inkhawm-ah thu a sawi bakah niminpiah khan Saitual District a Keifang Kawn-ah hun a hmang bawk a, heng hunah hian MPCC President chuan dinchhuah tuma tan la mekte puih chu nuam an tih thu leh an tanpui zel dawn thu sawiin, “Chu chu kan Manifesto lian ber pawh a ni bawk. Kawng tinreng a eizawnna ngelnghet siam hi kan tum a ni,” a ti a. “Mizoten ram kan nei, mipui kan nei bawk, chumi enkawl tur Sawrkar tha chu kan mamawh ber a ni. Kan rilru puthmang, kan ngaihtuah dan, kan ngaihhlut zawng hi kan thlak a ngai a, kan ram hi a siam that theih a ni tih hi kan pawm a ngai,” a ti.

MPCC President chuan nakum 2023 kum tawpah kan inthlang dawn tih sawiin, “Kan Chhiah tlingkhawm dik lo taka lo suasamtute, chutiang avanga lo hausa tate chuan mipui sum an eisak hmang khan min lei an tum dawn, kan vote lei an tum dawn. Heng mite hian i vote ringawt lei an tum a ni lo, nangmah kha lei che a tum a ni zawk. Mihring lei theih - Sal emaw, Nawhchizuar ang lekah an ngai che tihna a ni. Lei theih i ni lo a, Mizoram siamtha turin i duhna ngeiah vote i thlak thei, i rinawmna kha lo hralh suh ang che,” tiin “Kan ram hi kan la siam thei, chumi tur chuan kum 2023 MLA General Election hi a pawimawh em em a ni. Kum 2023 election-ah hian ram siamthat i duh tak tak a ni tih kha i vote hmangin lo lantir ang che,” a ti bawk.

Congress an sawrkar a nih chuan thlai chin uarna hmun bik area an siam tur thu pawh MPCC President chuan sawiin, “Chung thlai chingtute mamawh leh an mamawh intawmte chu ‘Tang Puihna’ hmangin kan pui dawn a ni. Tanpuina hi nuai bi atanga mamawh intawm, kawng, electric, tuilak, etc siam nan vaibelchhe tel thlengin kan tanpui dawn. Sawiselna tur ringawt zawnga lo chang thinte chuan he ruahmanna hi lo sawisel rawh se, mahse hei hi kan ti dawn. He hnam hi a dingchhuak thei, min daltu chu keimahni tho hi kan ni,” a ti bawk. MPCC President chuan Khawzawl District leh Saitual District thar an lawmpui thu pawh sawiin, “MNF-in a pek an tum tawh a, a thuam famkim hna chu Congress Party-in kan tum ve thung ang,” a ti bawk.