MZP in CM hnenah an thlen

Mizo Zirlai Pawl (MZP) General Hqrs. a hruaitu rual te chuan nimin khan Chief Minister Zoramthanga hmuin ramri-a Assam chet dan chu thlithlai reng a ngaih thu an hrilh.

MZP General Hqrs. hruaitute hian tunhnaia Assam sawrkarin Bairabi Zophai-a Status Quo chhunga kut an rawn thlak leh Thlam pahnih lai an sak chung-chang chu Chief Minister hi nimin khan a Pisa-ah an sawipui a, Chief Minister in rang taka hma a lak avangin lawmthu a hrilh a, chutih laiin Assam chet dan hi uluk taka thlithlai reng a ngaih thu leh an hmalakna chu na taka chhanglet vat zel turin a ngen a. Chief Minister pawhin a theihna apianga hma a lak tur thu leh Assam Chief Minister nen pawh sawi dun an tum thu a lo sawi tih MZP chuan an sawi.

Hei bakah hian Mizoram hmun hrang hranga kawngpui siam mek thawktu NHIDCL te sulhnu chu a chhe hle tih pawh MZP hian Chief Minister hi hrilhin, a bik takin an lung hman chuan duhthu a sam loh avangin hmala turin MZP chuan Chief Minister a ngen a. Chief Minister chuan a lo enzui tur thu leh a concern Ministry pawh sawipui a tum thuin a lo chhang a ni.

Kum 2002 atanga an lo hman tawh Zo hnam inkhawmpui lian Zofest chu kumin December ni 6-9 chhung hian Thenzawl-ah hman a tum thu pawh Chief Minister hnenah hian MZP chuan sawiin, a hlawhtling theih nana theihtawp a chhuahpui tur thu Chief Minister hian a lo hrilh a. Thangram Indigenous Peoples Movement (TIPM) in an chenna 180 Sq. Miles Mizoram State chhunga rinlut tura an hmalakna chu a theih ang anga hmalakpui tura an ngenna pawh Sawrkar in a theih ang anga hma a lak mek thu a lo hrilh a. Chief Minister hnena an thu thlen te tha taka a lo dawnsawn avanga lawmthu sawiin, beiseina sang tak nen a hmalakna ngen taka an thlir reng dawn thu an sawi bawk a ni.