Mizoram-ah Dengue leh Chikungunya a hluar

Mizoram chhungah Dengue leh Chikungunya hri a leng mek a, kumin ah Dengue vei 294 leh Chikungunya vei 24 an awm tawh.

Health and Family Welfare Joint Director (Malaria) Dr. Hmingthanmawii sawi danin kumin chhung hian Dengue hri kai mi 294 an awm tawh a, an zinga 159-te chu Aizawl District a chengte an ni a. Thla hlui, September thla chhung ringawt khan Dengue hri kai hi mi 159 an awm a, a tam ber hi Aizawl District amite an ni a. Dengue hri leng mek hi a na lo chi a nih avangin he natna avanga nunna chan hi Mizoram-ah an la awm lo ni a hriat a ni a. Kumin hian Dengue hri kai ni a rinhlelh mi 2,034 te endik an ni tawh a ni. Kum 2013 khan Mizoram-ah Dengue vei mi 7 hmuhchhuah an ni a, kum 2016 kha hmuhchhuah tam ber kum niin mi 580 in an vei a, kum 2017 khan mi 136 leh kum 2019 khan mi 131-in an kai bawk a ni.

Kumin chhung hian Mizoram-ah Chikungunya hri kaite mi 24 hmuh an ni tawh a, an zinga 22-te hi Lunglei District a cheng an ni a. Dengue leh Zika virus hri kaidarhtu Aides thosi-in a putdarh Chikungunya hi Lunglei khawpui chhung bakah Haulawng leh Sekhum khua ah te a darh mek a ni. Kum 2018 khan Chikungunya hri kai mi 10 an awm a, kum 2020 khan mi 67-in an kai bawk a, thihpui an la awm lo ni a thudawn a ni.

Comments

Popular News (Last 30 Days)

Vawiin-ah HSSLC Exam result