Nurse te hi hna ropui tak thawktu an ni - Dr. Thangtea

Health Minister Dr.R.Lalthangliana chuan nurse te chu damlote enkawl a, tihdam rawngbawlna thawktu, mi pawimawh an nih bakah hna ropui tak thawktute an ni, a ti.

Mizoram College of Nursing-a 35th Graduation & Lamp Lighting Ceremony, 2022 nimin-a MCON, Falkawn Conference Hall-a neih a hmanpuina ah Health Minister chuan he thu hi sawiin, Nurse te chu midangte tan malsawmna, mahni nun hlan zel turin leh inpekna nun nena damlo harsatna chinfel chungchangah te bakah damlo enkawlna kawnga fimkhura theihtawpa thawk zel turin a chah a. Nursing chu eizawnna zahawm tak leh ringtu te tan phei chuan Isua rawngbawlna chhawm nung zeltu te zing a mi an ni tih sawiin, Nurse lukhum (cap) chuan Nurse te nunah hmun pawimawh tak a chang a, inpumkhatna a entir a, lamp lighting chuan mite tanpuitu, mite tana thlamuanna thlentu, beiseina petu leh thiamna bik nei pholanna a ni, a ti bawk.

35th Graduation-ah hian Nurse Graduate mi 31 an awm a, Covid avanga Lamp Lighting tihpui takloh 3rd Semester te tel bawkin Lamp Lighter hi an vaiin 64 a ni a, an zingah hian PM Special Scholarship Scheme hnuaia Jammu, Kashmir leh Ladakh atanga lo zir mi 6 an tel a ni. MCON hian Graduate Nurse mi 406 an nei tawh a, tunah hian zirlai 124 an awm mek a, Certificate in Community Health leh Ayush Doctor training te pawh neih thin a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man