Kan upa tawlh tawlh a, kan hriatna a pung tawlh tawlh a, kan fing tawlh tawlh a ni - I&PR Minister

I&PR Minister Lalruatkima chuan, “Kan upa tawlh tawlh a, kan hriatna a pung tawlh tawlh a, kan fing tawlh tawlh a ni,” a ti.

Tuikual North MUP buatsaih Upate Ni lawmna inkhawm Inrinni-a neih a hmanpuina ah he thu hi sawiin I&PR Minister Lalruatkima chuan, “Hnam ropui apiangin upate an zahin an ngaihlu a, keini pawhin kan tu leh fate thlengin upate hlutna kan inzirtir a pawimawh a ni,” a ti a. “Zawlbuk a bo hnuah YMA, MUP, MHIP ten chhiat thatah mawhphurhna lain kan ram leh hnam kal zelna atana mi tangkai, sawrkar thurawn petu niin Val Upa dinhmunah an ding ta a ni,” a ti bawk.

I&PR Minister chuan MUP member te chu an pawl dinchhan leh thil tum - Ram leh Hnam Hruaitute leh Sawrkár pawh a theih ang kawng kawnga finchhuahpui; Ram leh Hnam kalhmang leh nundan phung te, thil tha lo leh chhiatna kawng hawi ni ngeia hriatte kawng dik kawh hmuh; Zoram Political Party hrang hrang te thukhat vuaa thil tih a tul hun leh a tul dan thute a ngaihdan pek ve thin; Upa leh tupawh, harsatna kawng hrang hrang leh manganna nei te, hamtha záwka an awm theihna kawng ngaihtuahpui tih te leh a dang te hre reng a, hlenchhuah tuma ram tana mi tangkai ni chhunzawm zel turin a chah bawk a ni.