EF&CC Minister in National Wildlife Week hawng

National Wildlife Week, 2022 chu hman mek niin he Hapta hawnna hi nimin khan Aizawl a Assembly Annexe-ah EF&CC Minister TJ. Lalnuntluanga hovin neih a ni.

National Wildlife Week vawi 68-na hawnna hunah hian EF&CC Minister TJ. Lalnuntluanga chuan National Wildlife Week hian a tum chu ramngaw leh nungcha humhalh kawnga mitin in kan tihtur inhrilhhriatna leh kan lo dam khawchhuah nana nungcha te pawimawhna leh kan chhehvel kan chenna chereu zel tur do leh kan tu leh fa te rohlu kan hnutchhiah tur inzirtirna leh infuihna a ni, a ti a. Sawrkar laipuiin nungcha te chenna leh anmahni humhalh nan dan Wildlife Protection Act, chu kum 1972-ah lo duang a, Mizoram-ah he dan hi kum 1974 ah hman tann a nih thu a sawi a. Ramsa leh nungcha chhena venhim hi Wildlife Protection in a tum a nih thu leh Mizoram hi khawvel biodiversity hotspot 36 zinga pakhat niin, flora and fauna ah kan hausa hle a, chung venhim leh humhalh chu mitin mawhphurhna a ni, a ti bawk.

Mizoram-a Protected Area 10 zingah National Park 2, Wildlife Sanctuary 7 leh Tiger Reserve pakhat kan neih te a hlut thu sawiin Minister chuan, heng Area-ah te hian dan in a phalloh thil leh tih tura mipui min phut te tih hlawhtlin chu kan tih makmawh a nih thu a sawi a. Khaw hrang hrangah Community Forest Reserve kan neih te hi Sava leh Khuai thlenga an chenna (habitat) tha niin, hei hian kan ram chunga Greenary percentage tisangin leh ramngaw chereu tur a ven thu a sawi bawk.

EF&CC Minister chuan India rama khawpui chhunga ramngaw siam nana project- Nagal Van chu Municipal Area-ah chauh neih tura ruahman ni mah se Mizoram sawrkarin Union Ministry a ngen angin Mizoram-ah Municipal pakhat chauh a awm avangin, Mizoram pumah a zau zawka hman a nih theihnan District 11-ah Nagar Van Project kalpui chu a rem tih thu a sawi a, heihi India ram state danga la awm ngailo a nih thu a sawi bawk. Hei bakah hian School Nursery leh Sahuan tih zauh leh tih changtlungna turin sawrkar laipuiin a rawn angin proposal pawh siam mek a nih thu sawiin, Mizoram hi Burma, Bangladesh te nen ramri neiin ramsa tawlhruk chungchangah harsatna kan nei avangin sawrkar laipui-ah Protection Squad pe turin ngenna a kal mek thu a sawi a. Tunhnaiah Ramsar List 5 zingah Pala, Siaha District telh a nih chu lawmawm a tih thu leh hei hian hmasawnna huang zau zawk a ken tur thu sawiin, Tam Dil pawh Ramsar List a telh tura hmalak mek a nih thu a sawi bawk.

National Wildlife Week, 2022 hi Oct. 2 atanga hman thin ni mah se remchan zawkna avangin nimin khan a hawnna hi neih a ni a, he hun hi PCCF R.K. Singh chuan kaihruaiin tun thla ni 8 thleng khian he Hapta hi hman a ni dawn a ni.