Bru Voters 1,992 te Mizoram Roll atangin paih tawh

Mizoram Election Department chuan Mizoram-a Vote nei Bru zinga Tripura a inbengbel tawh mi 1,992-te hming chu Mizoram Electoral Roll atangin an paih tawh.

Hemi chungchanga Joint Chief Electoral Officer David Liansanglura Pachuau sawi danin Bru vote nei mi 1,992 paih tak zinga 1,899-te hi Tripura State Election Commission-in paih tura ERONet kaltlanga an hming an rawn pekte an ni a. Tun thleng hian Mizoram Electoral Roll a chuang leh lo awm nghet sa Tripura Electoral Roll a thun thar Bru vote nei mi 6,052 te chu Tripura SEC chuan an hming a thun tawh a, Mizoram-a vote la nei, Tripura Roll-a a thun tawhte hi mi 5,000 chuang an ni. Liansanglura chuan Bru vote la awmna Mamit, Kolasib leh Lunglei District thuneitute chu ERONet kaltlanga Mizoram Electoral Roll atanga lo paih tura ngenna te lo tipuitling nghal thuai thuai turin an hriattir thu a sawi a. Heng District-a Assembly bial pathum theuhah hian Tripura a inbengbel tawh ni site chu an hming a la awm nual a ni.

September ni 26 khan Tripura High Court chuan November thla a Autonomous District Council inthlan hma ngei a, Bru vote nei thei zawng zawng Electoral Roll a thun vek turin Tripura Election Commission a hriattir a. Heti chung hian ERONet kaltlanga Bru vote nei hming an thunte Mizoram Election Department hnena hriattir kawngah Tripura Election Commission chu a la muangchang hle thung a ni.

Tarlan tawh thin angin kum 2020 January thla a sawrkar laipui, Mizoram leh Tripura sawrkar leh Bru pawl hrang hrangte inremna angin Tripura Relief Camp a awm, Mizorama kir leh duh lo te chu Tripura a an inbenbel remtih a ni a. Heta inbengbelte hi Tripura Electoral Roll-a an hming thun vek a, Mizoram Electoral Roll atanga an hming paih tur a ni a. Kum 2018 Assembly inthlanpui-ah khan Tripura a awm, Mizoram Electoral Roll-a hming la chuang si Bru mi 11,000 chuang an awm a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man