Aizawl DC Office-ah ILP atanga sum hmuh tam

Tunhnai kum hnih leh a chanve chhungin Aizawl District chhung atangin Inner Line Permit (ILP) pekchhuah 13,618 a awm a, chung atanga sawrkar sum hmuh chu Rs. 5,66,36,120 a tling.

ZALEN in RTI Act hmanga zawhna a siam, Aizawl DC Office SPIO in a chhan danin, kum 2018-19 leh 2019-20 chhunga Aizawl District chhung atanga ILP pekchhuah zat leh chumi atanga sum hmuh zat chu DC Office kang vangin record engmah haichhuah theih a ni tawh lo a. Kum 2020-21 ah erawh ILP pekchhuah 5,147 awmin, chumi atanga sawrkar sum hmuh chu Rs. 1,97,14,080 a tling a, kum 2021-22 ah ILP pekchhuah 4,964 awmin, chumi atanga sum hmuh chu Rs. 2,38,17,940 a tling bawk. Kum kal mek 2022-23 (January - July) chhungin ILP pekchhuah 3,507 awmin, chumi atanga sum hmuh Rs. 1,31,04,100 a tling a, heng tunhnai kum 2 leh a chanve chhunga ILP atanga sawrkar sum hmuh zawng zawng chu Rs. 5,66,36,120 a ni.

SPIO chhanna atanga a lan danin, ILP pekchhuah zingah Construction Works an tam ber a, Karimganj, Assam atanga lokal an tam ber bawk. ILP diltuten Application Form Rs. 200 in an lei a, an fill up hnuah an awmna Veng Local Council an sign tir a, documents tul ang ang thil telin, Security Deposit recognized Bank-ah Rs. 2000 an deposit a, chu chu Office-ah thehlutin, Application an thehluh chu uluk takin endik a ni a, siam theih nia hriat te chu ILP siamsak thin an ni a, Fee Rs. 2,000 pein an lachhuak a, Security Deposit chu an chhawr hun chhung a zawh hunah peklet an ni thung.