YouTuber thenkhat te koin Dan inhrilhfiahna neih a ni

Tunhnaia naupang kaihhnawih pawikhawihna thlengah naupang kumtlinglo hming leh nihna, Digital Media/YouTube-a pholan a nih chungchang ah Mizoram State Commission for Protection of Child Rights (MSCPCR) chuan nimin khan YouTuber thenkhat chu Commission Office-ah koin hemi kaihhnawih dan chungchangah fimkhur lehzuala tan la turin inhrilhfiahna hun a hmanpui.

He hunah hian Commission Chairperson Dr. C. Lalsangzuala chuan tunhnaia Internet Social Media - YouTube, Facebook, WhatsApp leh Digital Media platform danga naupangte hming, thlalak leh video te dan kalh a pholan a ni thin chu ngaihmawhawm a tih thu a sawi a, hetiang hi nakin zela naupang an lo thanlen huna khua leh tui tha an nih theihna tur kawng daltu leh midang in an chhinchhiah bik theihna tur thil pawi tak a nih avangin JJ Act 2015 Section 74 hnuaiah khap tlat a ni, a ti a. Dan bawhchhetute chu hrem an nih theih nan Commission chuan hma a la zel tawh dawn tih a sawi bawk.

JJ Act 2015 Section 74 hnuaiah naupang dan kalh a che emaw, naupang venhim ngai emaw, pawikhawihna tuartu emaw pawikhawihna thlenga thuhretu emaw te chu an hming, address, School emaw an chanchin dang, an nihna tilang thei tur pholan leh puanzar khap a ni a, he Dan bawhchhetute chu thla ruk (6) thleng lung In tan tir emaw, cheng nuai hnih (2) thleng pawisa chawitir emaw, a pahnih emaw a hrem kawp theih an ni.