Union Minister in Department hotute Meeting neihpui

Mizoram-a rawn zin Union Minister of State Sadhvi Niranjan Jyoti-i chuan nimin khan Aizawl-a Secretariat Conference Hall-ah Food, Civil Supplies & Consumer Affairs Department hotute, Food Corporation of India (FCI) leh Bureau of Indian Standards (BIS) Hmarchhak Office hotute Meeting a neihpui.

He hunah hian Union Minister of State Sadhvi Niranjan Jyoti-i chuan Food, Civil Supplies & Consumer Affairs hotute chu ration buhfai semna reng rengah khawl bukna a chhiat palhin, buk lung pangngaiin an buk ngei tur a ni, a ti a, ration semna hmun thenkhata bur leh tin te an hman thin a nih thu a zinna ah an lo thlen tih sawiin, hei hi thil phal loh hulhual a nih angin hetiang hi a awm loh nan Supply hotute chu hma la a, enfel turin a hrilh a ni.

FCI lamin Mizoram hmun 6-a Kudam an neih thu an tarlan chungchangah Union Minister chuan District tinah FCI Kudam hi awm se duhthusam a ni dawn tiin, hemi chungchang hi lo zirchiang turin FCI lam hi a hrilh a, Mamit District chu Aspirational District a nih angin ngaih pawimawh hmasak ni se tiin a hrilh bawk.

He hunah hian BIS, Hmarchhak hotu chuan Bureau of Indian Standards in Hmarchhakah consumer ten an chanvo leh dikna an hriat theih nana hma an lak dante, BIS Certification dinhmun te an tarlang bawk a. BIS hnuaia hian Mizorama thilsiamna (factory) 8 in BIS Certification an nei a, hengte hi thir siamna factory 2 leh tui (packaged water) sawngbawlna factory 6 te an ni a. Rangkachak kaihhnawih ah a quality leh a dik tak a ni em tih finfiahna mi pakhat hnenah pek a ni tawh bawk.