Union Cabinet Minister Smriti Zubin Irani-i’n Zankhat riakin Mizoram a rawn tlawh

Sawrkar laipui Ministry of Women & Child Development leh Ministry of Minority Affairs te changtu Union Cabinet Minister Smriti Zubin Irani chuan zan khat riak turin Inrinni khan Mizoram a rawn thleng a, nimin khan Mizoram a chhuahsan leh nghal a ni.

Mizoram a rawn thlen hnu hian Smriti Zubin Irani hian Lunglei pan nghalin DC Conference Hall-ah Lunglei District a Head of Offices te a kawm nghal a, Lunglei District-a Department hrang hrang hnuaia sawrkar laipui Scheme (Centrally Sponsored Schemes) kalpui mekte dinhmun leh hmachhawpte sawiho niin Sawrkar Official-te chu mipui rawngbawltu an nih angin theihtawp chhuaha an hna thawk thin turin a chah a. District hmasawnna chu Head of Office kalkhawmte kutah thui tak a innghat tih sawiin, an hma zawn theuha hna chanpual leh tihtur awm te uluk leh taima taka thawk zel turin a chah a, an hna kalpui danah District mipuite hmasawnna leh hamthatna dah pawimawh hmasa thin turin a chah bawk. Mipuiten sawrkara an harsatna thlen theihna tur Public Grievance Cell din te, tar leh pianphunga rualbanlote tan a camp buatsaih te, kuthnathawktute tan tangkai zawka Scheme thenkhat thlunzawm (convergence) te ngaihpawimawh a tul tih sawiin, hna an thawhna ah harsatna leh mamawh an neih chuan tanpui turin sawrkar a inpeih reng tih kalkhawmte chu a chah bawk.

He thutkhawm ah hian Lunglei District Bawrhsap Kulothungan A chuan Lunglei District dinhmun tlangpui leh sawrkar hmalakna langsar zualte tarlangin, sawrkar laipui Scheme hmanga hmalakna hrang hrangte a tarlang bawk a ni.

Union Minister hi chawhnu lamah Aizawl-ah letin sawrkar mi pawimawh te a kawm a, nimin khan Durtlang North-a One Stop Centre chu tlawhin Durtlang North-a awm bawk Child Care Institution pawh a tlawh nghal a, hemi hnu hian Hunthar Veng-a State Social Welfare & Rehabilitation Centre, Swadhar Greh leh Ujjawala Home te chu tlawhin heng hmun hrang hrang a tlawh a awm te leh thawktute nen inkawmna an nei a, hemi hnu hian Mizoram a chhuahsan leh nghal a ni. Heng hmun hrang hrang a tlawhna ah hian Minister hi Social Welfare Minister Dr. K. Beichhua leh sawrkar mi pawimawh dang ten an tawiawm a ni.