Mizoram-ah COVID-19 hri kai enkawllai 390 awm

Nimin tlai thleng khan Mizoram-ah COVID-19 hri kai enkawllai mi 390 an la awm.

Zirtawpni khan Mizoram-ah Sample 333 enfiah niin heng atang hian COVID-19 hri kai mi 64 hmuh an ni a, heng te hi Rapid Antigen Test hmanga hri kai hmuhchhuah te vek niin Sample enfiah atang chhutin za zela 19.22 te chuan hri an kai a, Khawzawl District tihloh District dang zawngah hri kai hmuhchhuah an awm a ni. Inrinni khan Sample 309 enfiah ni lehin heng atang hian COVID-19 hri kai mi 49 hmuh leh an ni bawk a, Sample enfiah atanga za zela 15.86 te chuan hri kaiin an vai hian Rapid Antigen Test hmanga hri kai hmuhchhuah vek an ni bawk.

Inrinni khan Mizoram-ah hri kai mi 122 te anmahni enkawlna hmun atanga chhuahtir niin nimin khan mi 65 te chhuahtir an ni ve leh a, heti hian nimin tlai thlenga Mizoram-a COVID-19 hri kai hmuhchhuah tawh chu 2,37,373 niin an zinga 2,36,261 te chu enkawl dam an ni tawh a, hri kai hmuhchhuah atanga za zela 99.53 te chu enkawl dam ni tawhin hri kai enkawllai mi 390 an la awm a, hri kai zingah mi 722 an boral tawh bawk a ni. Tun dinhmunah District tinah COVID-19 hri kai enkawllai hi an la awm a ni.