Solar Town atan sum hmu lo

Power and Electricity Minister R. Lalzirliana chuan Sawrkar laipui thupek anga District tina Solar Town kalpui turah a kalpuina tur sum Central Sawrkar-ah dil mek a ni tih a sawi.

Nimin-a Assembly Inkhawm ah C. Lalsawivunga zawhna leh zawh belhna dangte a chhanna ah P&E Minister hian, Mizoram District Capital zingah Saitual chiah Solar Town-a puanfel a la awm tih a sawi a. Solar Town hi State Sawrkar-in a duhthu-a a kalpui a ni lo a, Sorkar laipui Ministry of New and Renewable Energy (MNRE)-in District tinah Solar Town pakhat tal puang tura a rawn tih zulzui-a hmalakna a ni tih a sawi a. Prime Minister in MP leh MLA zawng zawngte an bial-ah Model Village siam tura a hriattir ang deuhin, Solar Town pawh hi Ministry of New and Renewable Energy-in District tina kalpui tura a rawn tih a ni, a ti a. Solar City-ah Central atanga sum hmuh a nih loh thu leh tun dinhmunah chuan sum hi an la dawn miau loh avangin District tinah chuan kalpui a la harsa rih tih a sawi bawk.