New Delhi-ah Chief Minister in mi pawimawh te hmu

Mizoram Chief Minister Zoramthanga chu Mizoram thil pawimawh ah New Delhi-ah zin mekin sawrkar laipui-a mi pawimawh te a kawm.

Chief Minister Zoramthanga hian niminpiah tlai khan Prime Minister Narendra Modi chu a chenna In-ah hmuin Myanmar a remna siam turin India in hma a lak a ngaih thu a thlen a. Prime Minister pawhin ngai pawimawh in, remna siam chu mihringte tih tur pangngai a nih thu leh theihtawp chhuah a nih tur thu in a chhang a ni.

Heng bakah hian Chief Minister chuan Assam Rifles sawnchhuah vat a tul thu te, MNF Returnee-te tana Insakna tur puihna hma lo chhawp tawhte tihhlawhtlin a nih nana tanpui mamawhna te a sawipui a. Mipuiin HUDCO atanga loan an lo lak tawh cheng vbc. 18 vel an laka rulh loh la awm rulh sak tura ngenna te, Chief Secretary atana Mizo tawng thiam ngei pek a ngaih thu leh tuldang pawimawh te Prime Minister hnenah hian thlen in sawipui a ni.

Hemi hnu nimin khan Chief Minister Zoramthanga hian Defence Minister Rajnath Singh chu New Delhi-a a Pisa-ah hmuin Cantonment Board area-ah Mizoram in hmun a mamawh ve thu a thlen a. Cantonment Board area-a State te tan ram dil theihna hmun awmah hian hma laksak tura ngenin, Defence Minister pawhin a ngaihtuah turte hnena thlena a theih anga bawhzui sak a tum tur thu in a chhang a ni.

Heng bakah hian India leh Myanmar ramri chungchang an sawidun bawk a, Chief Minister chuan Bangladesh leh Myanmar ramri pahnih ah Mizo telna Paramilitary Force dah tha a tih thu sawiin, Rajnath Singh chuan a tul anga la sawiho ni se tiin Home Minister te nen pawh sawiho tha a tih thu a sawi a ni. Chief Minister hian tunkar Thawhlehni khan New Delhi hi a thleng a ni.