CSS tih hlawhtlinna ah State sawrkar che muang ti

Ministry of Consumer Affairs, Food & Public Distribution leh Ministry of Rural Development changtu Minister of State Sadhvi Niranjan Jyoti-i chuan Centrally Sponsored Scheme (CSS) tih hlawhtlin kawngah Mizoram sawrkar chu an chet muan thu a sawi.

Mizoram-a rawn zin Sadhvi Niranjan Jyoti hian nimin khan Aizawl-a Secretariat Conference Hall-ah thuthar thehdarhtute kawmin, CSS-ah Central-in 90% leh State-in 10% an tum thin thu sawiin, “Central-in pawisa kan released hnua State-in 10% a pek ve phawt loh chuan a dang pek chhuah zel a harsa a ni. Central in a tih tur a ti a, State-in a tih tur a tihve a ngai,” a ti a, Central-in sum released mah se, State-in a tumve tur a pekchhuah phawt loh chuan hamthatna dawng turte'n an dawn theih loh thin thu a sawi a ni.

Pradhan Mantri Awas Yojana (PMAY) hnuaiah mirethei ten In an neih theihna atan Prime Minister-in theihtawp chhuahin hma a la tih sawiin, “Mizoram tan hian PMAY hnuaiah mi 15,674 ten In an neih theihna tur sanction a ni a, kum 2023 a zawh vek tur a ni. Hetiang a nih lai hian tunah hian In 5,800 (40% vel) chiah sak zawh a la ni. Minister leh sawrkar official-te ka ngen duh, a hun taka zo turin hma la se, a dang pawh sanction leh theih a ni dawn,” a ti bawk.

Prime Minister-in Self Help Hroup (SHG) pawh a ngai pawimawh hle tih sawiin Union Minister chuan, “Sawrkar laipui a Congress sawrkar lai khan Mizoram-ah SHG 2,600 vel chiah a awm a, BJP sawrkar hnuah chuan 7,872 a awm tawh. Congress sawrkar khan Mizoram SHG-te tan cheng vbc. 3.80 vel lek a pe a, keini chuan cheng vbc. 41 chuang kan pechhuak tawh. SHG hnuaiah hian kan Prime Minister hian a bik takin hmeichhiate dinhmun chawikan a ngai pawimawh hle,” a ti.

PMGSY hnuaiah Mizoram tan kawng KM 4,442 vela thui laihna atan cheng vbc. 2,840 vel sawrkar laipuiin sanction tawh tih Jyoti-i chuan sawiin, “Mizoram hi international boundary pahnih nei a ni a, chuvangin inkalpawhna chungchangah tih belh theih a awm em tia ngenna Home Minister hnenah ziakin ka thlen dawn. MNREGA hnuaiah pawh cheng vbc. 258 ruahman a ni a, Mizoram ang state lian lo tan chuan a tam tham a ni,” a ti a, sawrkar laipui chuan COVID-19 lai pawhin hna a thawh char char thu a sawi bawk.

Union Minister chuan Mizoram loneitute fakin, “Food Processing Industry din duh an awm chuan hma ka lakpui thei a, duh an awm chuan hma ka lakpui ngei ngei ang,” a ti a. State sawrkar thenkhat chuan inthlan dawna an intiamna ang an sawrkar hnuah an tih leh loh thu sawiin, “Mizoram  sawrkar pawhin nuai thum kan sem ang an ti a, an sem lo,” a ti a, nuai 5 sem intiam Telegana sawrkar pawhin an la sem loh thu a sawi bawk.

Comments

Popular posts from this blog

Volleyball S/F khel dawn