Maumual-ah Hnam Sipai tan Inhmun 500 chuang siam

Deputy Chief Minister Tawnluia chuan Maumual hmunah MNF Hnam Sipai Remna avanga lo haw te tan Inhmun 500 chuang siam a ni tih sawiin, Maumual ram neitute hnenah Compensation pek tawh anih thu House a hrilh.

Nimin-a Assembly thutkhawmah Deputy Chief Minister Tawnluia chuan Aizawl South-I bialtu MLA C. Lalsawivunga zawhna chhangin Maumual ram chu MNF Hnam Sipai tan kum 1987-88 inkarah buatsaih a nih thu sawiin, allotment pawh pek vek a ni tawh tih a sawi a, Sawrkar inthlak avangin chak taka hmalakna a awmlo a, tunah hian Maumual Housing Complex chu Sawrkarin tuaihnum a tum tih sawiin, Tui leh Eng lakna leh a kalkawng te pawh siam tum a ni tih a sawi bawk.

Deputy Chief Minister chuan tun dinhmunah Maumual ramah in 10 vel chauh awm nghet an awm tih sawiin, awm an la tlem avangin tui connection pek a la harsa tih a sawi a, Sawrkarin theihtawpin hma a la mek tih a sawi bawk.

PHE changtu ni bawk Deputy Chief Minister Tawnluia chuan Jal Jeevan Mission (JJM) kaltlangin hmun thenkhatah plastic pipe hman a ni tih sawiin, plastic pipe an lo hmansa tawh chu a tlo thu a sawi a, GI Pipe pawh hman a nih thu leh tun dinhmunah GI Pipe vek hman a ni tawh tih a sawi bawk.