Assembly House-ah ‘The Mizoram (Land Revenue) (Amendment) Bill, 2022’ pass a ni

Nimin-a Mizoram Legislative Assembly thutkhawm ah Revenue Minister Lalruatkima Bill putluh ‘The Mizoram (Land Revenue) (Amendment) Bill, 2022 chu Member ten an sawiho hnuah pass a ni.

Revenue Minister Lalruatkima chuan a Bill putluh chu Sawrkar laipui Swamitva Scheme zul zuia siam a ni dawn tih sawiin, a tum ber chu thingtlang mirethei te tana Valid Pass, Property Card neih tir a ni tih a sawi a, heng Property Card atangin Bank Loan an la thei tawh dawn tih a sawi bawk. Revenue Minister chuan tun dinhmunah thingtlang khua 48 chu chunglam atanga thlalak fel a ni tawh tih sawiin, leilung-a tehchhuah hna chu khaw 10-ah kalpui mek a ni tih a sawi a Temporary Pass nei te atangin Compensation sawrkarin zaa 15 a la tawh dawn tih sawiin, Solatium erawh Temporary Pass neitute chanpual tur vek anih thu a sawi bawk.

House Leader Zoramthanga chuan The Mizoram Land Revenue (Amendment) Bill, 2022 chungchang sawiin, a hmaa Temporary pass neituten ram an hawh atanga thlai leh thil an neih ringawt ni lo in ram hlutna an chang ve thei tawh dawn tih a sawi a, Sawrkarin a hawh avangin zaa 15 a chan ve a ngai tih sawiin, ram luahtute chuan a tam zawk zaa 85 lai an la chang dawn thu leh mipuite tan hlawkna nasa tak a awm tih a sawi bawk. Chief Minister chuan State tana tha ber tura tih a ni tih pawh sawiin, mipuiin a hlawkna an chan theih nan duan a nih thu a sawi a, thlai leh In hlutna chauh hmu lo a ram hlutna an hmuh ve theih nan siam a ni tih a sawi bawk.

He Bill sawihona ah hian Member hrang hrang 23 in an sawiho a, Congress Legislature Party Leader Zodintluanga Ralte chuan mi harsa zawk ten Compensation an lak atanga zaa 15 an lak chu tha an ti lo tih a sawi a, MNF Sawrkar laiah mipui sum chan tur an laksak nasa tih sawiin, kumtin a loneituten ram an lo enkawl Sawrkarin zaa 15 an laksak chu mipui chanai tur ei sakah sawrkar puhin, Mizoram Sawrkar sum nilo thildang atanga pawisa lokal mipui ta tur lak sak chu a tha lo takzet tih a sawi bawk.

Opposition Group Leader leh ZPM MLA Lalduhoma chuan Sawrkar laipuiin dan alo siam tawh angin State te chuan dan an siam ve thei a, amaherawhchu State Sawrkarin mipuite sum ei hek zawngin dan an siam theilo a ti a, State in a dan a siam leh Parliament dan siam te a inkalh chuan Parliament dan a lal zawk thin tih sawiin, mipuite sum ei hek chu a thalo takzet an tih thu a sawi a, ZPM Legislature Party chuan an pawmpui ve theilo tih a sawi bawk.