Kumin ah Dengue kai mi 84 an awm tawh

Tunlaia Mizoram-a Dengue natna leng mekah August thla chhung khan hri kai mi 84 zet an awm.

Health Department-a Joint Director (Malaria) Dr. Hmingthanmawii’n AIR Aizawl a hrilh danin kumin January atanga August thla tawp thleng khan Mizoram-ah Dengue hri kai leh kai lo mi 1,330 endik zingah mi 135 chuan an kai tih hmuhchhuah a ni a. Aizawl khawpui chhungah phei chuan hri kai an tam hle a, Aizawl District-a Dengue hri kai hi mi 106 an ni a. Lunglei District-ah mi 12 an awm bakah Champhai District-ah 7 an awm bawk a. Mizoram-a he hri leng hi a hlauhawm loh zawk leh a veite’n an tawrh nat loh zawk a nih avangin tun thlengin Dengue vanga nunna chan an la awm loh thu Dr. Hmingthanmawii chuan a sawi bawk.

Dengue vei leh vei lo endikna atana an hman pakhat Rapid Test hi sawrkar laipui-in a pawm loh avangin Elisa khawl hmanga hmuhchhuah chauh pawm a ni a. Aizawl-ah mimal enkawl damdawi In leh Laboratory thenkhatah Elisa khawl hi a awm a, sawrkar enkawl-ah chuan Civil Hospital leh ZMC-ah chauh a awm thung a, Lunglei Civil Hospital tih loh District dang sawrkar enkawl damdawi In-ah chuan he khawl hi a awm lo nia thudawn a ni.

Mizoram-ah hian kum 2013 khan dengue vei 7 hmuhchhuah a ni a. Heta tang hian kumtin he hri vei hi an awm ziah a, kum 2016 khan tam berin mi 580-in an vei a, kum 2017-ah mi 136 in veiin kum 2019 khan mi 131-in an vei bawk a ni.