Damlo awmpui leh kan chungchang DMS sawipui

Serchhip Town Joint VC Association hruaitute chuan Serchhip District Hospital-a damlo awmpuitu leh damlo kan/tlawh chungchang ah a hma anga kalpui leh tawh an duh thu Serchhip District Medical Superintendent hnenah ziakin an thlen.
Serchhip Town Joint VC Association tunhnaia thukhawm in an rel angin an hruaitute chuan nimin khan an Chairman B. Vanlalngura hovin Serchhip District Medical Superintendent (DMS) Dr. ZD. Lalmuanawma chu a Pisa-ah hmuin COVID-19 hri leng avangin hun rei tak Serchhip District Hospital-ah damlo kan leh damlo awmpuitu inthlak awih loha a awm tawh thu leh hri leng avangin hei hi thil tul tak a ni tih an sawi a. Amaherawh chu tunhnaiah hri leng in ziaawm lam te a pan tak avang leh District danga Damdawi In dang leh ZMC te pawh an zawhchianna ah a hmaa an kaldan anga an kal tawh nia a lan avangin tuna kaldan chu mipui tana harsatna thlentu a nih bawk avangin a hma anga damlo awmpuitu leh damlo kan kalpui thin dan anga kalpui leh tawh tha nia an hriat thu an thlen a ni.

Serchhip DMS chuan Serchhip Town Joint VC hruaitute hnenah hian hri leng chu a la reh fel lo tih sawiin, hetianga rawtna a awm chuan District danga an kalpui dan te pawh an lo zawh tur thu leh thawktute nen pawh an lo sawiho ve tur thu a sawi a, mipui tana tha tur chu ngaihtuah tlan a ngai tih a sawi a. VC hruaitute chuan damlo awmpuitu inthlak hleih theihloh awm mek chu chhungkaw dinhmun a zirin mipuite tana harsatna nasa tak thlen theitu a nih thu leh khual atanga damlo rawn awm te tan phei chuan harsatna a nasat thu te pawh an sawi bawk a ni.

Comments

Popular posts from this blog