‘Aizawl-a Motor lut hmasa ber’ lehkhabu tlangzarh

Deputy Chief Minister Tawnluia chuan Inrinni khan Aizawl-a Synod Conference Hall-ah ‘Aizawl-a Motor lut hmasa ber’ tih lehkhabu chu a tlangzarh.

He lehkhabu tlangzarhna hunah hian Deputy Chief Minister chuan Aizawl-a motor khalhluttu hmasa C.Rochhinga (L) chu pa tumruh, hmathlir thui tak nei, taima, huaisen leh mahni inrintawkna nei ngah mi a ni tih sawiin, a chanchin chhiartu te tan zirchhuah tur tam tak a awm thu a sawi a. Mizo pa tlawmngai, hawihhawm leh aia upa te zahthiam, Mizo hnam rilru pu mi a nih thu pawh sawiin, Mizo hnam changkanna leh hmasawnna atana ngaihtuahna seng thin mi a nih thu a sawi bawk. Deputy Chief Minister chuan Pu C.Rochhinga tu leh faten an pa chanchin, tunlai thangthar te chhiar theih tura an buatsaih chu lawmawm a tih thu a sawi bawk.

C.Rochhinga hi kum 1919 January thla khan Sialhau-ah a piang a, September 10, 1942-ah Sairang atangin Aizawl-ah Truck (Chevrolet 15 CWT) a khalh lut a, Aizawl-a motor khalh luh hmasak ber a ni.