‘Mi Ngo Nukiri leh a fapa Tlira’ lehkhabu tlangzarh

Chief Minister Zoramthanga chuan Zirtawpni khan Dr. Laltluangliana Khiangte lehkhabu (lemchan) ziah ‘Mi Ngo Nukiri leh a fapa Tlira’ chu a tlangzarh.

CM Conference Hall-a he lehkhabu tlangzarhna hunah hian Chief Minister chuan Mizo Literature tihausa belh tur lemchan lehkhabu ziak tlangzarh thar a nih chu lawmawm a tih thu leh, history a thil thleng behchhan a nihna chuan thil thlen dan leh Mizo history chhui zui tham a la awm ngei tih a rawn pholang nia a hriat thu a sawi a. Literature hausakna mai bakah history zirchian belh duhna te a hrinchhuah belh zel a beisei thu a sawi bawk.

‘Mi Ngo Nukiri leh A Fapa Tlira’ tih lemchan hi chan thum-ah thensawm a ni a, lan 11 awmin phek 112-a chhah, a lemchan phek tak chu phek 100 niin Rs.150/- man a ni a. Mizo lalte khan intiamrualin an chhehvel ram te kha an run fo a, kum 1840-1870 inkar, kum 30 chhung vel ringawt pawh khan Chittagong, Burma, Manipur, Cachar, Sylhet leh Tripura te chu vawi 20 vel zet chu an run a (Zoram Vartian 35). Kum 1871, Pawlkut thla ni 23-a Bengkhuaia pasaltha ten Alexandrapur thingpui huan an zuk run chu he lemchan bul intanna tak hi a ni a; a nghawng chhuah te chu he lemchanah hian engemaw zat hmuh theih a ni.

Dr. Laltluangliana Khiangte hian lemchan puitling 29 a ziak tawh a, tawng danga lehlinte nena chhiar chuan lemchan 43 vel a ziak tawh a ni. Chung avangte chuan kum 2018 khan cheng nuai khat keng Sangeet Natak Akademi Puruskar (Award for playwright) chawimawina a dawng tawh nghe nghe a ni.