VC bye-election hun puang

State Election Commission, Mizoram chuan Baktawng (Serchhip District) Village Council-a Seat ruak pakhat (Hmeichhe tana Seat hauh) a bye-election neih hun atan September 6, 2022 a ruat.

Hemi chungchangah hian nimin khan State Election Commission chuan thuchhuah siamin Sub-rule (1) of Rule 3 leh Rule 37 of the Mizoram (Election to Village Councils) Rules, 2014 leh Section 3 of the Lushai Hills District (Village Council) Acts, 1953(as amended) in inthlan buatsaih tura thuneihna a pek angin inthlanna neih tur thu hi a puang a, inthlanna neih hun tur puan a nih rual hian hming pekluhna hun pawh hawn nghal niin tun thla ni 18 tlai dar 3:00 thleng Nomination paper thehluh theih a ni anga, a tuk August 19, 2022-ah hming pekluh te hi enfiah tur niin August 22, 2022 tlai dar 3:00 thleng in-hnukdawk duhte tan hun hawn a ni anga, Sept. 6, 2022 zing dar 7:00 atanga tlai dar 5:00 thleng Vote thlakna hun hawngin Vote tla te hi chhiar nghal tura ruahman a ni a, engemaw avanga Vote thlak that ngai a nih chuan a tuk Sept. 7, 2022-ah Vote thlak that tur a ni ang.

Hetianga Baktawng VC-a bye-election neih a nih dawn avang hian Serchhip District-a Election hotute pawh inthlanna buatsaih tur hian an inpuahchah nghal a, he inthlanna a Returning Officer tur hian Govt. Baktawng H/S-a thawk K. Vanzama ruat ni tawhin inthlan chuh tum te tan hian a hnenah hian hming pekluh theih a ni a. Ani bakah hian Presiding Officer leh Polling Officer-te ruat leh tur an la ni ang. Hetianga inthlanna neih tur puan a nih tak avang hian Bye-Election neihna tur khua Village Council Constituency huamchhungah Model Code of Conduct (MCC) lekkawh nghal a ni bawk.

Baktawng VC bye-election hun puan a nih rual hian Mizoram District 8-a VC dang 17-a inthlanna neih tur leh District Council hnuaia VC bye-election leh AMC hnuaia Local Council bye-election neih tur pawh puan nghal a ni.

Comments

Popular posts from this blog

Volleyball S/F khel dawn