Thil eng pawh ti dawn ila vision neih a ngai - Lalduhoma

ZPM Leader Lalduhoma chuan thil eng pawh ti dawn ila vision neih a ngai tih sawiin, “Kan vision chu a ngelnghetin a tluantling (sustainable) tur a ni thung,” a ti.

ZPM Research Wing buatsaih ‘Workshop on Vegetable Market’ Chaltlang Tourist Lodge-a niminpiah a neih ah he thu hi sawiin ZPM Leader chuan thil eng pawh ti dawn ila vision neih a ngai tih sawiin, ram hruai an tumna ah pawh vision a ngaih thu leh dream mai mai erawh a ni tur a ni lo tih a sawi a, “Kan vision chu a ngelnghetin a tluantling (sustainable) tur a ni thung a. Tluantling tur chuan a pawimawh hmasa chu a eizawngtu tan eizawnna tlak a nih a ngai phawt a ni. Pahnihna ah chuan midang tan leh vantlang (society) tan thil tha lo thlen tur thil a ni tur a ni lo, Zu zawrh kha sum hmuh nan a tha viau mai thei, mahse vantlang tan a tha lo. Pathumna ah chuan Environment Friendly a ni tur a ni,” a ti.

Lalduhoma chuan a taka Vegetable Supply Chain ti tute, a bikin loneitute’n rin ngam harsa an tih thu an sawi chuan a rilru a luah hle tih he hunah hian sawiin, rinawm takin sumdawnna kawngah pawh Mizote hi kan la kal theih a beiseiawm tih a sawi a. “Thlai inchintir ringawta, a Market ngaihsak zui loh a tam, hetiang mai mai hi kan duh tawh lova, zirchianna Research Case in ZPM chuan hma kan la a ni,” a ti bawk.