Serchhip-ah Vawk Insurance chungchang zirho a ni
Serchhip P&E Veng YMA Hall-a he zirhona neih hi DRDA Serchhip District Project Director Malsawmtluanga chuan hawngin MzSRLM thawktute ruahmanna a hetiang hun buatsaih a ni chu lawmawm a tih thu leh Mizoram in Vawk hri leng avanga harsatna nasa tak tawka mi tam takin Vawk an chan laia hetiang hun buatsaih a ni chu lawmawm a tih thu a sawi a, Vawkvulhtute pawhin an chhawr tangkai ngei a beisei thu a sawi bawk.
He huna tarlan a nih danin Vawk Insurance hi National Insurance Company te nena thawhdunna tur niin MzSRLM hian AH & Vety Department te nena tangkawpin an kalpui dawn a, nimin-a he hun hmanna ah hian AH & Vety Department atangin Dr. Lalmuanpuia Samte, Veterinary Officer chuan thu a sawi bawk a, he hunah hian District chhung khaw hrang hrang atangin SHG aiawh mi 41 an tel a ni.
Ruahman ang chuanVawk Insurance hi Cawk hlut zawng chhutchhuah sa mila kalpui tur a ni a, Vawk hlutna za zela panga (5% of Pig Market Value) leh GST belhkhawm te kha an policy leina tur a ni a, Vawk hlutna (Sum Insured) kha Rs. 50,000 a nih chuan insurance a tihna tur zat chu Rs. 3,540 a ni dawn a ni. Accident vang emaw, natna vang emaw-a thi te tan chauh Insurance-a sum hmuh let tur hi dil (claim) theih a ni a, an policy lei ni atanga chhiara ni 30 chhunga Vawk hi a thi anih erawh chuan Insurance hi hmuh theih a ni rihlo thung. Insurance an hmuh theih zat chu an Vawk thi bazar rate-a a hlutna za zela sawmriat (80%) a ni.
Comments
Post a Comment