MJA Kolasib District ten hmalakna thenkhat an tlawh

Kolasib District MJA te chuan nimin khan Bairabi leh a chhehvel tlawhin Zophai-a Mau chi kui tiahna hmun - Bamboo Nursery te, Rel-a Teak thing hralhchhuah mek leh kawngpui te an en.

  Kolasib MJA te hian Bairabi bul Zophai-a Bamboo Nursery leh RKS Nursery te an tlawhna ah Mau chi kui tiaka hmun danga an pekchhuah dan te an en a. Hetah hian Bairabi North VCP R. Lalfakawma leh J. Lalmalsawma, Aizawl Electric Veng te chuan Nursery siamin, Brandisi, Rawnal leh Rawmi an ching a, Brandisi Mau chi hi Tamil Nadu atanga an lakluh niin, Tissue Culture hmangin an tipung a, Sikkimensis (Rawnal) hi Imphal, Manipur atanga an lak luh niin an sawi bawk.

  Heng Mau chi tha an tih te hi Mizoram Horticulture Department in Supply tura an tih angin Mizoram hmun hrang hrangah lirthei hmangin an hralhchhuak a, Mau chi pakhat hi Rs. 30/- a an lei thu sawiin, a tiak pakhat Rs.75/- zelin Department-ah an pechhuak leh a, Thudawnna in a tarlan danin J. Lalmalsawma leh R. Lalfakawma te hian Mau tiak 70,000-80,000 inkar ve ve an supply a, bill hi NEC leh National Bamboo Mission sum atanga pek thin niin thudawnna chuan a sawi bawk.

Kolasib MJA-te hian Bairabi Rel Station tlawhin helai atanga tunlaia Teak thing thawnchhuah mek dan an en bawk a, Bairabi atanga Teak thing thawnchhuaktute hi Mizoram Timber Transporter Association niin, tunah hian Forest Department atangin Rel Wagon 159 thawnchhuah phalna an neihah Wagon 84 thawnchhuak tawhin, heng zinga Wagon 13 chu thing zai sa niin, hei hi Wood Based Industry Owners Association-te thawnchhuah a ni thung. 

MJA-te hian Mizoram leh Assam inrina lui ni-a an sawi, Zophai IR Police Outpost panna a Bairabi lui kanna Lei dawh mek, Assam lamin an tihbuaia avanga dawh chhunzawm loh pawh tlawhin, Contractor Laldinpuia Ralte, Bairabi South chuan he Lei hi a dawh chhunzawm ngam tawh lo ni a thudawn a ni a. Lei hi lui kam lehlam lehlamah a Foundation Wall zawh fel niin, a bak chu khawih chhunzawm lohvin a awm a ni. Kolasib MJA-te hian Meidum leh Hortoki inkara Chhimluang lui kanna Lei dawh hna, KR Constructions in an thawh mek pawh a hmunah an tlawh bawk.