Serchhip-ah mihring hmanga sumdawnna leh hetiang laka naupangte venhim dan tur zirhona neih a ni

Kumin July 30-a ‘World Day Against Human Trafficking’ denchhenin nimin khan Serchhip-ah mihring hmanga sumdawnna (Human Trafficking) chungchang inhrilhhriatna leh hetiang thil naupang chunga thleng thin pumpelh dan kawng zirhona neih a ni a, he hun hi Serchhip District Bawrhsap Nazuk Kumar IAS chuan a hmanpui a ni.

National Commission for Protection of Child Rights (NCPCR), State Commission for Protection of Child Rights (SCPCR) leh Serchhip District Administration te tangtlang in Serchhip DC’s Meeting Hall-a he hun an buatsaih ah hian Bawrhsap Nazuk Kumar IAS chuan Serchhip District chhungah mihring hmanga sumdawnna case awm rih lo mah se engtiklai pawha lo thlenga lo awm ve thut thei anih avangin kan inbuatsaih lawk a ngaih thu leh a invenna leh a lo thlen palha a umzui hnaah mawhphurtu tam tak kan awm avangin a mawhphurtu Department thawktuten inpuahchahna tha tak kan neih lawk a tul a ni, a ti a. Mizoram chu mipuite inpawhna leh inlaichinna a that vangte, Kohhran leh tlawmngai pawlte inpekna avangte in India ram hmun dangte nena huang khata dah theih a ni lova, Child Labour ah te, Bonded Labour leh Prostitution lamah te case kan nei mang lova, amaherawh chu ramri-a awm kan nih avangin International Human Trafficking lamah kan mit kan len nasat deuh deuh erawh a tul a ni, a ti bawk.

Serchhip District Superintendent of Police Stephen Lalrinawma pawhin Mizoram-ah kum 2000 atangin Human Trafficking Case kan neih thu leh Case kan ngah ber kumah case pasarih (7) ziahluh niin kum 2000 atanga kumin thlenga kan Case ziahluh tawh zat chu 35 a ni tih a sawi a, Trafficking tuartu mi 95, puitling 62 leh naupang 33 chhanchhuah tawh niin, a mawhphurtua puh Mizo 47 leh hnamdang 17 thubuai siam sak an ni tawh tih sawiin, Mizoram dinhmun tlangpui a tarlang a. Rampawn (Foreign)-a hna zawngte leh India ram khawpui lian zawka hna zawngte chungah hetiang hi a thleng nasa bik nia tarlangin, an hnathawhna ram azira han umzui mai harsa deuh te pawh a awm a, an va awmna hmuna Mizo Welfare ten nasa takin hetiang tuartute chhanchhuahna kawngah Police te an tanpui thin thu a tarlang bawk a ni.

Nimin-a Human Trafficking zirhonaah hian Serchhip District-a hetiang case lam buaipuitu Police te, District Child Protection Unit (DCPU) a thawktute, naupang enkawlna Home hrang hranga thawktute, Juvenile Justice Board (JJB) aiawhte leh Official pawimawh dangte telin State Commission for Protection of Child Rights (SCPCR)-a Member Dr. Julie Remsangpuii chuan he Commission hnathawh dan tlangpui a sawi a. National Commission for Protection of Child Rights (NCPCR) atanga lokal mithiam bik Anshu Sharma chuan ‘Naupang hmanga sumdawnna laka inven dan’ (Preventing Child Trafficking) tih thupui hmanga zirtirna a lem nen pein kalkhawm ten sawihona hun zau tak an hmang zui a ni.