I-Day Football khelh leh a ni
Independence Day/Screening Football Tournament 2022 nimin a 1st Division inkhel hmasa berah match thum khelh hnua hnehna chang vek awmchhun Hmar Veng FC chu Vengchung FC lakah si hnih faiin an tlawm a, Vengchung FC tan Lalthansanga leh Joshua Lalrinzuala te chuan goal an khung a ni. Nimin a inkhel vawi hnihna ah Chanmari FC in Bungpui FC Hriangtlang chu 3-2 in an hneh a, Chanmari FC tan V. Lalmalsawma, G. Tlanghmingthanga leh C. Lalrintluanga ten goal khat theuh khungin Bungpui FC tan Lalengliana chuan goal hnih a khung a, Bungpui FC te hian match 4 an khelh tawh ah point an la hmuh loh avangin Season thar-ah 1st Division khelh zui thei turin an dinhmun a him ta lo hle a ni.
Match thum a zawna an tlawm hnuah AWC FC chuan nimin khan FC Serchhip Kawnpui chu Lalhunruata goal khung hmangin si khat faiin an hneh a, point 3 hlu tak an rawn hmu a, nimin-a inkhel hnuhnung ber ah Chhekhnai FC chuan New Serchhip FC chu 2-1 in an hneh bawk a, Chhekhnai FC tan Lalthuthlunga chuan goal hnih khungin New Serchhip FC goal awmchhun hi H. Vanlalruata khung a ni thung.
Vawiin hian 2nd Division ten Group Match an khel chhunzawm ve leh dawn a, zing dar 9:30-ah Group A atangin Chhim Veng FC leh Bungtlang Bazar FC inhmachhawnin hemi hnu hian Group B atangin FC Serchhip Kawnpui Vs Dress Up FC leh Darnam FC Vs Hmar Veng FC (White) an inhmachhawn leh anga, Group C atangin Field Veng FC Vs Chanmari FC leh New Serchhip FC Vs Hmar Veng FC (Red) te an inhmachhawn ve leh bawk ang.
Comments
Post a Comment