RTI zawhna chhan danah MPCC te lungawilo

Mizoram Pradesh Congress Committee (MPCC) Vigilance Cell Chairman, C. Ngunlianchunga MLA leh a thawhpuite chuan nimin khan Mizoram State Chief Information Commissioner Lalnunmawia Chuaungo hnenah Account and Treasury-in RTI chhanna an pek loh vanga lungawi lohna hi an thlen.

MPCC Vigilance Cell hotute sawi danin, MPCC Vigilance Cell Secretary Lalhruaitluanga Bawitlung chuan July ni 15, 2022 khan Mizoram Treasury hrang hranga cheng nuai 100 chung lam Bill neite nihna kimchang leh payment pek an nih dan a zawh chu fiah lo taka chhan a nih avangin July ni 18 khan thuneitu sang zawk hnenah thlenin, a zawhna chu chhang ngei turin an ngen nawn a. Hei hi Account and Treasury lam chuan Record an neih loh avanga an chhan theih loh thu July ni 27 khan hriattir a ni, an ti.

MPCC Vigilance Cell chuan bill la tur leh payment an pek turte zawng zawng Amount, Contractor hming leh Address chu felfai taka Treasury Officer ten record kawl vek nia an hriat avang leh, sawrkarna an lo chelh ve tawh chhunga experience neite an zawh atanga an hriat danin, RTI an chhanna hi dik tawklo awma kan hriat avangin RTI thuneitu sang zawk, Chief Information Commissioner chu a tul anga hmalak sak turin an ngen a ni.

Chief Information Commissioner chuan hemi chungchang ah hian dan a awm a, dan angin an kal mai turah a ngai tih sawiin, an ngenna chu an lo zirchian tur thu MPCC Vigilance Cell hotute chu a lo hrilh a ni.