MPCC in a thusawi vanga thupha chawi turin Deputy Chief Minister an phut thu an sawi

Mizoram Pradesh Congress Committee (MPCC) chuan July thla chhunga SEDP sem a nih tur thu sawitu Deputy Chief Minister Tawnluia chu thupha chawi tura an phut thu an sawi.

MPCC Media Secretary C. Lalhriatpuia leh hruaitu dang te hian nimin khan Aizawl Press Club-ah thuthar thehdarhtute kawmin June 28, 2022 khan Deputy Chief Minister Tawnluia chuan Khawhai Town Hall-a Tuichang South Block MNF Conference a hmanpuinaah, chhungkaw sing 6 hnenah SEDP tanpuina Rs. 50,000/- zel pek a nih tur thu a sawi thu leh, “July 2022 chhungin DC tin atangin pawisa an semchhuak thei tawh turah ka ngai,” a ti niin an sawi a. Hei hian MNF Party chhungah leh thingtlang kuthnathawktu rethei tak takte rilruah beiseina sang tak a siamsak nia sawiin, “Amaherawh chu, July thla a liam a, August ni 2, 2022 thleng hian SEDP tanpuina dawngtu chhungkua sawi tur pakhatmah an la awm ta chuang lo a. Deputy Chief Minister Pu Tawnluia’n July thla chhunga pekchhuah hman a nih tur thu sawia Tuichang bial mipuite leh Mizoram mipuite beiseina sang tak a siamsak chu Beiseina lem mai a ni tih a chiang leh ta a ni,” tiin a thusawi chungchangah hian Deputy Chief Minister chu mipui hmaa thupha chawi ngei tura an ngaih thu leh a chawi duh lo a nih chuan an party Worker leh mipui zahna nei miah lo ah an ngaih tur thu an sawi bawk.

Hei bakah hian MPCC hruaitute chuan kum 2018-a ZONET-in Inthlan thlirlawkna a buatsaih tum khan Zoramthanga chuan SEDP cheng nuai 3 sem a harsat loh tur thu a lo sawi tawh thu leh, “Kum 5 chhung, term khat project a ni a, kumtin Rs. 60,000/- a ni a, thla tin Rs. 5000/- a ni mai a. MR hlawh pawh a zat lo a, thil harsa tur a ni lo,” a lo ti tawh niin an sawi a. MNF sawrkar hnu hian Budget vawi 4 pharh ni tawhin SEDP atan hian cheng vbc. 1913 dah a nih tawh thu leh SEDP atana MNF sawrkar sum dah hi a tam tawk viau thu sawiin, kum 3 leh a chanve chuang an sawrkar hnu pawha SEDP dawng chhungkaw pakhat pawh sawi tur an la awm lo chu hriatthiam theih a ni lo tih an sawi a, “Ram hruaitu lawk pahnihten hetiang taka chianga an sawi tawh chung pawha tun hun thlenga SEDP cheng khat pawh sem a la ni lo hi a mak takzet a, mipui zah lohna dik tak niah kan ngai,” an ti bawk.

Comments

Popular posts from this blog