Mizoram-ah a vawi khatna atan Japanese Encephalitis (JE) natna hmuhchhuah a nih thu nemnghet ta

Tunhnaia Trinity Hospital, Aizawl atanga Japanese Encephalitis (JE) natna vei nia rinhlelh hmuhchhuah chu National Centre for Disease Control (NCDC), Delhi chuan Mizoram-a Japanese Encephalitis (JE) case hmasa ber a nih thu a rawn nemnghet ta.
Kan rawn tarlan tawh angin kumin July thla khan Trinity Hospital, Aizawl-a damlo pakhat, kum 68 mi chu Japanese Encephalitis (JE) vei ni ngeia hriat a ni a, hei vang hian July ni 14 khan a Sample (Serum leh CSF) chu enfiah tura thawn a ni a, July ni 18 khan result chhuakin Japanese Encephalitis a kai tih hmuhchhuah a ni. Amaherawh chu July ni 21 khan Health Department chuan thuchhuah siam nghalin hri kai hmuhchhuah tarlan hi ELISA (Antibody Test) hmanga hmuhchhuah a nih thu leh hei hi Confirmatory Test a nih loh avangin a CSF sample chu Test na rintlak zawk (Real Time-PCR) a test turin Lal Path Laboratory, Kolkata-ah thawn a nih thu leh July 20, 2022-ah he Sample Test result hi tihchhuah niin a Sample hi a Negative (JE virus not detected) avangin Japanese Encephalitis Confirmed Case anga pawm theih a ni lo tih an tarlang a ni.

Hemi hnu, nimin August 18, 2022 khan Integrated Disease Surveillance Project (IDSP)-a SNO Dr. Pachuau Lalmalsawma chuan thuchhuah siamin he JE vei nia rinhlelh hi Mizoram-a JE case hmasa ber ni turin nemngheh a nih thu a tarlang a. He thuchhuah ah hian tunhnaia Trinity Hospital, Aizawl atanga Japanese Encephalitis (JE) natna vei ni a rinhlelh leh bawhzuina kal zelah Health & Family Welfare Department chuan National Centre for Disease Control (NCDC), Delhi chu Mizoram-a JE natna hmuhchhuah hmasak berna a nih dawn avangin thutlukna siam tura ngen a nih thu leh hemi chungchangah hian Department chuan hmalakna tul angte kalpuiin natna vei ni ngaih chenna hmunah JE natna awmtheih dan chi hrang hrang (epidemiology, entomological, environmental) te chhuina neih leh a ni tih a tarlang a. “Trinity Hospital in Investigation hrang hrang an tih tawhna report-te chu Central IDSP, NCDC, Delhi-ah thawn niin anni’n an lo zirchian hnuah he JE vei nia rinhlelh hi Mizoram-a JE case hmasaber niturin an rawn nemnghet ta a ni,” a ti a. Hemi chungchangah hian hmalakna tur thil inchhawp te a awm avangin, Director, National Vector Borne Disease Control Programme, Delhi pawh hriattir nghal a nih thu leh he natna hmuhchhuahna kawnga Trinity Hospital-in theihtawpa hma an lo lakna zawng zawngah Department chuan lawmthu a sawi tih a tarlang bawk a ni.