Mat-a tui tla la zawng mek

Inrinni chhun dar 12:30 vel khan VL. Hmangaihzuala, Thenzawl Vengchhak chu Serchhip leh Thenzawl inkar Mat lui-ah chesualin tui-ah a tla a, he thu buatsaih lai thleng hian zawn mek a ni.
Thudawn danin kum 15-a upa VL. Hmangaih-zuala s/o Laltlanzauvi, Thenzawl Vengchhak hi a thian dang mi 5, Presbyterian English School Thenzawl-a pawl 10 zirlai te nen Mat lui-ah hian inbual turin an kal a, VL. Hmangaihzuala hi a thian te pahnih ten Ke-a tui daikai an tum chu lui lai-ah chesualin tui-ah hian an tla a, a thiante pahnih hi luikam-a phairuang-ah inhamtang thei mah se VL. Hmangaihzuala hi tui hian a la a, a thiante hian an chhan thei ta lo a ni.

Hetiang tui tla an awm tih hriat a nih hian Serchhip leh Thenzawl atangin thalai rual thahnem tak chu Mat lui lamah hian tui tla zawng turin an liam nghal a, tui a len deuh avanga duh anga hmalak theih a ni lo chungin Chawm kai thlang ah Ngar hem nghal a ni a, nizan-a he thu buatsaih lai thleng hian a hmunah mi tlawmngai tam tak la awmin chanchin lawmawm hriat tur a la awm lo a. Tuitla zawngtute hi Serchhip lam atangin Sub-Hqrs. YMA hruaitute pawhin an thutchilh reng a, Vawiin lam pawh hian zawn zui leh tur a ni ang.