Leimin vangin Bungtlang-ah In pahnih chhiain In 5 luah ngam loh in a awm mek bawk

Nimin zing-a Bungtlang khawchhunga leimin vangin chhungkaw pathum luahlai chenna In pahnih chu leimin in a hnawl chhe vek a, In dang 5 chu luah ngam loha awm mekin mihring thi leh hliam an awm lova, he leimin avang hian NH. 54 chu lirthei eng chi mah kaltlang theihloh in a ping mek a ni.

Thudawn danin Bungtlang Bazar Veng Area (hmar lam tawntirh)-ah nimin zing dar 4:00 vel khan NH. 54 kawngpui chhaklam chu min in hei hian Lalthanpara In, chhungkaw member 5 chenna chu a hnawl chhe vek a, he In hi Assam Type niin an Inhnuai ah hian an In sak thatna tur bungrua engemaw zat an chhekkhawl nen leimin hian a hnawl vek a, leimin in In a hnawl hma hian helai hmun vel hi a lo min tawh avangin In neitute hi an bungraw thenkhat nen an inthiarfihlim hman a ni. Hemi hnu hian an In bula PC. Lianzuala In, chhungkaw member 3 te chenna pawh leimin hian hnawl ve lehin he In hi Semi-RCC niin anni hi tunhnaia NH. 54 laih avanga zangnadawmna an lak hmanga an sak thar a ni thung a, an In hnuai hi Vanhlupuii, chhungkaw member 3 te chuan an luah thung ni thudawn a ni bawk.

Bungtlang khua atanga kan thudawn chuan he leimin hi a mual pum chet-a che ang a ni tih sawiin, heng In a hnawl te pawh hi a chak lakchhuah tur pawh awm mang lo tur khawpin a chhilh hneh tih a sawi a. Bungtlang VCP R. Lallawmzuala chuan helai vel hi kum 2000 hmalam khan a lo chet tawh thu leh hun kal zelah hlauhawm tawh lo tura an ngaih thu leh tunhnaia ruahsur nasa avang khan a rawn che thar leh tih a sawi a ni.


He leimin avang hian chenna In pahnih a chhiat bakah hian In dang 5 chu luah ngam loh in a awm mek bawk a, an zinga 2 te chu a thenlai chhia niin a dang 3 erawh dinhmun hlauhawm a awm a ni thung a, vanduaina thlenna hmun hi nimin khan Serchhip District Bawrhsap Nazuk Kumar leh Addl. DC Lalmuansanga Ralte te chuan tlawhin an enfiah a, VC te hnenah hnatlang te thingpui lumna atan Rs. 5000/- an pek bakah harsatna tawk mek chhungkaw 9 te chu Rs. 1000/- theuh an pe a, leiminna bul khuh hul ngai te khuhna turin Silpauline 5 an pe nghal bawk.

He leimin hian NH. 54 chu nasa taka chhilhin nimin atang khan khawl pahnih hmangin leimin thenfai hna hi thawh nghal ni mah se he thu buatsaih lai thleng hian ala tlang rih lo a ni.

Comments

Popular posts from this blog