Kawlphetha MW 5 pechhuak thei tur Tlawva Small Hydel Project (SHP) hawn a ni

Kawlphetha MW 5 thleng pechhuak thei tura cheng nuai 7340 senga siam Tlawva Small Hydel Project (SHP) chu nimin khan P&E Minister R. Lalzirliana chuan a hawng a, Minister hian khawl tihnunna hmet nungin 33 kV Sub-Station Khawbung nen thlunzawma Eng pekchhuah nghal a ni

Champhai District Khawbung RD Block huamchhung Khuangthing leh Thekpui inrina a awm, Tlawva Small Hydel Project (SHP) hawnna hunah hian P&E Minister R. Lalzirliana chuan Tuipuiral tlang dung huamchhungah tui atanga Eng siamchhuahna, Tlawva Small Hydel Project hawn a ni ta chu lawmawm a tih thu sawiin, kawlphetha MW 2.5 pechhuak thei khawl pahnih tangkawp hmanga Megawatt 5 thleng siam chhuak thei tura duan chu tui tam dan azir ang zela power pechhuak tur a ni, a ti a. Tui chakna ringawt hmangin kum tluanin Power Full Capacity-a a siam theih loh avangin Thal laia tui khuahna siam tura ruahmanna neih a nih thu a sawi.

P&E Minister chuan kawlphetha-a intodelh thei tura Sawrkar hmalakna te tarlangin, 4 MW Kawlbem Small Hydel Project peihfela hawn thuai beisei a nih thu sawiin, Vankal Solar Project 20 MW pechhuak thei tur pawh zawhfel thuai beisei a ni, a ti a. Heng bakah hian Keifang-ah 10 MW Solar project, 24 MW Tuirini Small Hydel Project, 24 MW Tuivawl Small Hydel Project, 460 MW Chhimtuipui Hydro Electric Project (HEP), 76 MW Mat Sekawi Hydro Electric Project leh 3 MW Saiphal Small Hydel Project te thawk tura hmalak a nih thu a sawi a. East Lungdar to Khawbung 33 kV line zawm turin Central Electrical Board-ah dilna thlen a nih thu leh 132 kV line Sub-Station,12.5 KVA transformer Thingsulthliah-ah bun tum a nih thu te a sawi bawk.

He hunah hian Khual zahawm leh bialtu MLA Ramthanmawia pawhin Tlawva Small Hydel Project hawn ni chu an Bial tana hun hlimawm leh hriatreng tlak a nih thu sawiin, a hlawhtlinna tura a bul atanga tawp thlenga sawrkarna fawng chelhtu hrang hrang, Official-te leh tha thawhtu hrang hrangte hmalakna fakawm a tih thu a sawi bakah, an bial aiawhin lawmthu a sawi a. A Bial chhunga Power siamchhuahna hawn thar chuan Power intodelhna a siam ngei a beisei thu sawiin, Thal lai pawha Power pechhuak thei tur siam thei turin ngaihtuahna sen tel a nih thu a sawi bawk.

Tlawva Small Hydel Project hi suar tam tak chhawrdawh behchhana siam niin Tlawva SHP-ah hian tuikhuah hmun leh khawl (Turbine) awmna hmun insanhleihna hi meter 101.3 (ft. 300) chuang a ni a. He project-ah hian 2500 KW (2.50 Megawatt) khawl pahnih, a vaiin 5000 KW (5.00 Megawatt) bun a ni a, heng khawlte hi ruahtui tlak pangngai hunah chuan kumtin May thla atanga October thla thleng 5 MW pechhuak thei tura ngaih a ni a, November atanga February thla ah chuan chawhrualin 1 MW vel pechhuak tura ngaih a ni a, March leh April ah chuan khawl mamawh ang tui a awm dawn loh avangin khawl hi off a ni ang a, Servicing tih nana hman a ni anga. Kumkhat chhungin power 13.14 million unit siam chhuak tura ngaih a ni a, tluang taka khawl a tlan chuan kum khatah cheng nuai 517.43 thawk-chhuak thei tura chhut a nih bakah kum 20 chhungin project thawhna man hi hmuh let (Break-even point) beisei a ni.

He Project thawk tur hian NORTECH Power Project Private Limited, Kolkata chu Turnkey-a thawk tura thlan niin March 23, 2012 khan inremna ziahfel a ni a, a tira sum ruahman chu cheng nuai 5749.08 niin ennawn a nih hnuah nuai 7340 ah tihsan a ni a. Tlawva SHP-ah hian tui tling khawl loin Lui tui luang ang ang chu khawl khawh vir tira mamawh zat lak penna tur siam a ni a. Tui mamawh bak chu Lui tui lak penna atang hian a liam mai a ni.