Latest News

International Tourism Mart neih tur CM hovin ngaihtuah

Mizoram in kumin November 2-4 chhunga ‘International Tourism Mart 2022’ a thlen tur chungchang ngaihtuahin nimin khan Chief Minister Zoramthanga hovin Organising Committee chu an thukhawm.

He thutkhawm ah hian Chief Minister Zoramthanga chuan Union Ministry of Tourism leh Mizoram Tourism Department tangkawpin an buatsaih tur 'International Tourism Mart' chu khualzinte hipna atana hun pawimawh tak a ni tih sawiin, a hlawhtlin nan sawrkar hmalakna chauh ni lo mipui tawiawmna a pawimawh takzet a ni, a ti a. Khawvel hmun hrang hrang atanga Tourism Industry-a zin mite buaipuitu Tour Operator leh Travel Agent te lo fuankhawm tur hi Mizoram Tourism Industry atan a pawimawh zia leh hun bik chhinchhiah tlak a nih zia sawiin, Sorkar Department zawng zawng mai ni lova a ram pum tanho a tul thu a sawi bawk.

He thutkhawm ah hian Tourism Minister Robert Romawia Royte chuan NE State-a Tourism hmasawnna tura a bik taka Ministry of Tourism, Govt. of India in a duan International Tourism Mart hi kum 2013 atanga buatsaih a nih thu leh, kum tina NE State ten a inchhawka an thlen thin a nih thu a sawi a, Mizoram in a vawikhatna atan a thleng ve thei tur chu lawmawm a tih thu sawiin, tha tak leh hlawhtling taka kan buatsaih chuan khawvel ram zau zawkah Mizoram Tourism phochhuahna hun tha leh remchang a ni a, nasa taka hma kan sawn phahna tur a nih thu a sawi a. Mipuiten tha taka min lo dawnsawn pui turin a sawm a, khualzinte laka hawihhawm tur leh tanpuitu ni turin a ngen bawk.

ITM hi kumin hi a vawi 9-na tur niin Mizoram hi NE State zinga la thlenglo awmchhun a ni a, ITM atana Mizoram sawrkar inbuatsaihna kal zelah Sub-Committee 12 siamin a tul anga pawisa hman lailawk an remti bawk a ni.

Comments

Popular News (Last 30 Days)