Baktawng VC Electoral Roll thar tlangzarh
Baktawng Village Council-a Hmeichhe tana Seat hauh luahtu chuan hna dang a thawh tak avangin he Seat hi a ruak a, a hnawhkhahna atan inthlanna neih tura ruahman niin he inthlanna neih tur atan hian State Election Commission in ruahmanna a siam angin Electoral Roll enfiah hna hi thawh a ni a, nimin chawhnu khan Serchhip DC Meeting Hall-ah Final Electoral Roll hi Bawrhsap leh District Election Officer Nazuk Kumar IAS chuan a tlangzarh a ni. Electoral Roll tlangzarhna hunah hian Bawrhsap chuan Electoral Roll siamtha tura hma an lakna te sawiin, Political Party hrang hrang aiawh lokalte hnenah Eletoral Roll thar hi a hlan nghal a ni.
He hunah hian Election Officer Lalrinchhani Ralte chuan Electoral Roll tlangzarh tak chungchang sawifiahin, July 26, 2022-ah Draft Roll tarchhuah niin July 31, 2022 thleng hming thun, paih leh siamthat ngaite tan dilna hawn a nih thu a sawi a. Draft Roll atangin mipa 11 leh hmeichhia 3, an vaiin mi 14 paih an ni a. Mipa 1 leh hmeichhia 2, an vaiin mi 3 thun thar an nih thu a sawi bawk.
Electoral Roll thar atanga a lan danin Baktawng Village Council-ah hian Voters 1126 an awm mek a, an zinga 545 chu Mipa niin midang 581 hi Hmeichhia an ni a, Draft Roll aiin voters 11 in an tlem ta a ni.
Comments
Post a Comment