Ayush Aapke Dwar kharna Minister hovin neih a ni

Azadi Ka Amrit Mahotsav hnuaia hmalakna peng pakhat, mitin in ramhmul damdawi awlsam taka an neih theih nana an kawtkaia chhawpchhuah sakna, ‘Ayush Aapke Dwar’ kharna chu nimin khan Environment Forests and Climate Change changtu Minister TJ. Lalnuntluanga hovin neih a ni.

State Medicinal Plants Board (SMPB) Mizoram, Directorate of Ayush leh College of Veterinary Sciences & Animal Husbandry, Selesih tangho in an buatsaih ‘Ayush Aapke Dwar’ kharna hun Selesih-a Veterinary Sciences & Animal Husbandry College-a neih ah hian Minister TJ. Lalnuntluanga chuan Mizoram chhunga ramngaw ah te ramhmul damdawi chi hrang hrang a tam hle tih sawiin, EF&CC Department chuan ramngaw tichereu si lo a heng ramhmul damdawi te leh ramngaw atanga mihring mamawh mipuiin tangkai taka an hman theihna tura hma a lak thin thu a sawi a. Pi leh pu atangin Vawiin thlengin Mizote chuan ramhmul damdawi chi hrang hrang tangkai takin kan lo hmang tawh thin tih sawiin, heng damdawi kan neih te hi kan hlut thiam a, a chereu loh nana venhim hi kan mawhphurhna a ni, a ti bawk.

India ram zalenna champhaphak vawi 75-na denchhena hmalakna peng pakhat Ayush Aapke Dwar hi nikum September thla atang khan neih tan a ni a. India rampumah ram hectare 75000 tuamchhuakin ramhmul damdawi tiak nuai 75 semchhuah a ni a. Mizoram-ah pawh Health Minister Dr. R. Lalthangliana hovin kum kalta September thla khan a hawnna hun neih a ni. COVID hripui len lai a nih avangin In tinah ramhmul damdawi tiak sem hi a rem lo a, hei vang hian State Medicinal Plant Board Office atangin a duh apiangte tan semchhuah a nih bakah Thenzawl-a Ayush Hospital atangin semchhuah a ni bawk a. Medicinal plant chi hrang hrang 15 chu beneficiary 600 hnenah semchhuah niin a vaiin 27,154 semchhuah a ni a, hectare 5 a zau-ah phun a ni.