ASF vangin Vawk 254 thi tawh

Kumin hian Serchhip District-ah African Swine Fever (ASF) vangin Vawk 254 a thi tawh a, Vawk 354 suat a ni tawh bawk.

AH & Vety Department chhinchhiahna atanga a lan danin nimin, Aug. 14, 2022 thleng khan Serchhip-a khaw 8 te chu ASF hri lenna hmunah puan ni tawhin heng zinga khaw 7-ah te chuan ASF vanga Vawk thi a awm a, Inrinni khan North Mualcheng-ah Vawk 3 thi lehin Khawlailung-ah Vawk pakhat a thih bakah Vawk 26 suat a ni tawh bawk a ni.

Heti hian kumin chhungin East Lungdar-ah Vawk 96 thi tawhin 27 suat a ni tawh a, North Mualcheng-ah Vawk 71 thiin 30 suat a ni tawh a, Sailulak-ah Vawk 33 thiin 28 suat a nih bakah North Vanlaiphai-ah 32 thiin 24 suat a ni a, Lung-chhuan-ah Vawk 11 thiin Vawk 7 suat a ni tawh a. Bawktlang-ah Vawk 6 thiin 25 suat a nih bakah Khawlailung-ah Vawk 5 thiin 153 suat a ni tawh bawk. Heng bakah hian New Serchhip-ah ASF vanga Vawk thi la awm lo mah se ASF hri lenna ah puan ni tawhin Vawk 66 suat a ni tawh bawk.

Kumin chhung hian Serchhip District a Veng leh khua 9-ah Vawk thi 22 zet awm tawhin heng zinga 6 te chu Inrinni-a chhinchhiah thar te an ni a, Vawk thi Sample te hi enfiah tura lak a ni tawh bawk a ni.