1st Division inkhel chhunzawm

Independence Day/Screening Football Tournament khelh mekah nimin khan 1st Division Team ten an match thumna khelin Hmar Veng FC te chuan match thum khelh ah hnehna an la chang vek.

Nimin-a inkhel hmasa berah New Serchhip FC chuan AWC FC chu R. Lalmalsawma goal khung hmangin si khat faiin an hneh a, match thum an khelh tawh ah AWC FC te hian point an la hlawhchhuak lo a ni. Inkhel vawi hnihna ah FC Serchhip Kawnpui in Vengchung FC chu Rodinsanga goal khung hmanga si khat fai-a hneh bawk a ni.

Inkhel vawi thumna ah Hmar Veng FC in Bungpui FC chu 4-1 a hnehin Hmar Veng FC hian match thum an khelh tawh ah hnehna an la chang vek a, Bungpui FC tan Huntharnghaka chuan goal khung hmasa mah se Hmar Veng FC Lalfamkima chuan goal hnih khungin Lalhunthara leh Lalrinchhana ten goal khat ve ve an khung a ni. Inkhel hnuhnung berah Chhekhnai FC in Chanmari FC 3-1 in an hneh bawk a, Chanmari FC tan Felix Lalruatsanga chuan goal khung hmasa mah se Chhekhnai FC tan C. Vanlalruata leh Lalnunmawia ten goal khungin Chanmari FC Player Lalnuntluanga chuan an lamah goal khat a tilut a ni.

Vawiin hian 2nd Division ten an match an khelh chhunzawm ve leh dawn a, zing dar 9:30-ah inkhel tanin Group D atangin P&E Veng FC leh Keitum FC-II inkhelin hemi hnu hian Group A-ah Vengchung FC vs Keitum-I; Group B-ah Hmar Veng FC (White) Vs Dress Up FC leh Group C-ah New Serchhip Vs Chhekhnai FC leh Hmar Veng FC (Red) Vs Chanmari FC te an inhmachhawn leh dawn bawk a ni.