Tunlai sawrkar sum dinhmun Minister in a sawifiah

MNF Party chuan nimin khan Aizawl Mizo Hnam Run-ah Chhung Inkhawm neiin he hunah hian MNF Adviser leh Taxation Minister Lalchamliana chuan tunlai sawrkar sum dinhmun a sawi a, mi thenkhat ten kan Chief Minister in Finance Management a thiamloh vangah an puh tih sawiin, “Mahse sum leh pai enkawl thiamloh vang a ni lo,” a ti a.

State budget-ah vbc. 12,290 hi House-ah banpharin pass a ni a, State Own Tax leh Non-Tax Revenue atangin kumkhat ah za a sawm velin a pha lo a, State thenkhat chu zaa 60 deuhthawin an intodelh a, Mizoram-ah chuan hailuhna tur a awm lova, Central-ah a la inghat nasa a ni,” a ti. “Tax Devolution hi India sawrkar in tax a lak khawm zawng zawng a tehna fung hrang hrang atangin Duli vel Mizoramin a lo chang ve a, thlakhatah vbc. 50 share nei thin kha Covid avangin a tlahniam ta duai duai a ni,” a ti.

Kumin budget vbc. 2646.64 chu CSS atanga kan hmuh tur a ni tih Minister chuan sawiin, “CSS Scheme hi hmasawnna tura Central-in a State a rawn pek hian state sawrkar sum bawm-ah rei tak a tang thin hi a tha lo em em a. Tunhma chuan RBI-ah Mizoram hian account neiin State-in a sum kan hmuh hrang hrang kha a lut khawm thin a, kha khan sum kan hmuhna hrang hrangah min chhan a, tunah chuan khang kha a awm tawh loh avangin kan buai ta deuh thin. Amaherawhchu, kan thatna tur a nih te pawh ka ring,” a ti bawk.