ZMC ngaihtuah a ngai - Lalchhuanthanga MLA

Aizawl South-II bialtu MLA Lalchhuanthanga chuan Zoram Medical College (ZMC) chu ngaihtuah a ngai niin a sawi.

ZPM Party in nimin a Chhung Inkhawm Aizawl-a an Office-a an neih ah Aizawl South-II bialtu MLA Lalchhuanthanga hian Zoram Medical College (ZMC) chungchang hi sawiin, “A tirah chuan Referral Hospital angin a lo ding chhuak a, tuna sawrkar mekte sawrkar lai hian tih hlamzuih a ni a. Congress sawrkar khan theih ang angin an buaipui chho a, an term tawp dawnah Medical College an puitlin thei hram a; kum 2018 August thla-ah Class an tan a ni,” a ti a. Referral Hospital ti hlamzuihtute bawk kha tunah hian an lo sawrkar leh ta tih sawiin, “ZMC hi sawngnawi takin a chhuah a hlauhawm hle. Nakum March thlaah MBBS First Batch Final Exam an nei tawh dawn a, lo pass chhuak ta sela, eng dinhmunah nge an din ang tih hi ngaihtuah tham a ni. A chhan chu ZMC hi Recognise a la ni lova, Recognise ni lo atanga zirchhuak chu eng University-ah mah pawm a ni ngai lo,” a ti.

Lalchhuanthanga MLA chuan Recognise tur hian ZMC hian hmabak a la nei ko tih pawh sawiin, “Recognise theitu chu National Medical Commission a ni. A hma chuan Indian Medical Council a ni thin a, tunah hian Medical Institution-a registration leh thil pawimawh dang lo approve tute chu National Medical Commission an ni. Anni hi an lo kal khat em em mai a, nikum hmasa Covid hmaa an lo kal bak kha chu an lo kal leh tawh lo,” a ti a, National Medical Commission-in zirtirtu chungchangah duh dan hrang hrang a neih thu leh tuna kan ZMC dinhmun nen hian a in ang lo hle niin a sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar