Thenzawl-ah Lau lui thenfai hnatlang neih a ni

Inrinni kaltaa Tlawng lui fintu lui hrang hrang hnatlang neih a nih rualin Serchhip District-ah pawh Tlawng lui fintu Thenzawl-a Lau lui thenfai hnatlang chu neih a ni.

He hnatlang hi PHE Serchhip WATSAN Division, Serchhip Sub-Hqrs. YMA leh Vantawng Group YMA te huaihawta neih niin hnatlang tan hma hian Thenzawl Bazar-a Vantawng Newspaper Office kawt-ah inkhawm tawi neih a ni a, he hun hi Vantawng Group YMA President Chawngsangliana chuan kaihruaiin PHE Serchhip WATSAN Division-a Sr. EE, Er. F. Lalsanglura chuan Mizoram-a lui zawng zawng, ramri a lui luang tih loh chu Mizoram chhunga hnar nei vek, kan duha kan tihfaia kan humhalh theih vek anih avangin Mizoram kan vannei hle tih a sawi a, kan lui dung a thianghlim a, tui hna kan ngah zel theih nana kan vela lui humhalh chu mitin in kan mawhphurhna a ni tih kan hriatthar zel a pawimawh tak zet tih a sawi a ni.

Serchhip Sub-Hqrs. YMA President Kawlthuama pawhin PHE Department leh YMA ten luidung humhalh tura thawhhona an siam chu thil tul leh pawimawh tak a ni tih sawiin, kan chhehvel lui tui te tihthianghlim a tul zia mipuiah kan tuh a tul thu leh tunah hian kan khawtlang tan mai nilovin kan ram tan hna kan thawk a ni tih hre turin he huna thawkchhuak te chu a chah bawk.

He hnatlang-ah hian PHE Department-a thawk leh Serchhip Sub-Hqrs. YMA Executive Member bakah Thenzawl-a YMA Branch tin atangin mi 10 theuh thawkin hmun thum-ah an inthen a, Thenzawl khawchhunga luang Tlawng lui fintu Lau lui kam leh a vel te an thian a ni.