Keitum nu boral thu ah a pasal thu zawhfiah turin la

Serchhip District chhung Keitum khuaa Lalmalsawmi (36) chu nimin khan an In-ah thi-a hmuh niin a pasal leh midang pahnih chu thu zawhfiah turin Police ten an kawl mek.

Thudawn danin Lalmalsawmi leh a pasal Vanromawia te hi Keitum Field Veng-ah mi In luahin an fa te nen an khawsa a, nimin khan Vanromawia nau, nizan hmasa a an In-a riak ve chuan Lalmalsawmi chhungte hi Phone hmanga biain Lalmalsawmi dinhmun a that loh thu hi a hrilh a, an In an han thlen chuan lo boral tawhin a ruang pawh hi a lo dai tawh niin kan thudawnna chuan a sawi. 

He thil thleng hi Serchhip Police te pawh hriattir nghal niin Police te pawhin Keitum hi an thleng phei ve nghal a, thil awmdan an enfiah hnuah Lalmalsawmi pasal, Vanromawia leh an In-a riak ve nia sawi midang pahnih, Vanromawia nau leh a kawppui te chu thu zawhfiah turin nimin vek khan Police te hian an la nghal a ni. 

Lalmalsawmi ruang hi Postmortem turin nimin tlai khan Serchhip-ah rawn lak ni mah se Postmortem hman a nih tak loh avangin Serchhip Leisang Veng-a Lalringheti In-ah dah lailawk a ni a, nizan khan lumen a nih hnuah Vawiin hian Postmortem tura ruahman niin hemi hnu hian Keitum-ah a ruang hi lak leh tur a ni ang.