Serchhip Sports Complex-a bungrua rutute man

Tunhnaia Serchhip Sports Complex Stadium-a Aluminium Chokut leh Frame hrang hrang rutu nia hriat mi pathum te chu Serchhip Police ten manin an thil ruk te pawh hmuh kir leh vek a ni.
Thudawn danin tunkar Thawhtanni chhun khan Serchhip Police te chuan Serchhip Sports Complex-a Aluminium kawngkhar leh Frame te bo thu ah hian FIR dawngin an bawhzui nghal a, FIR an dawn atanga darkar thum vel chhungin heng thil rutu nia hriat mi pathum te hi man nghalin heng mite inpuanna atangin Aluminium an ruk thirchhe hralhna-a an lo hralh tawh te pawh nimin khan laklet leh vek a ni bawk.

He thil thleng kaihhnawiha Police ten an man hi Isaac Vanlalnunpuia (24), Lawrence Lalngaihpuia (30) leh Lalremruata (45) te niin an vai hian IOC Veng vek an ni a, heng mite hian June 17, 2022 zan khan Serchhip Sports Complex-a inthiarna leh Pindan atana hman Aluminium te hi Drilling Machine hmanga tichhiain an ruk thu hi Police te hnenah an sawi a ni. Heng mite hi thubuai siam sak an nih hnuah nimin khan Serchhip District Jail-ah thawn nghal an ni.