Facility nei tha lo chunga zirlaite hlawhtlinna Serchhip bialtu MLA in chhuanawm a tih thu a sawi

Serchhip Bialtu MLA Lalduhoma chuan khawvel ram changkang reng rengin an ngaih pawimawh chu Zirna leh Hriselna a ni tih sawiin, Mizoram-ah erawh chuan facility kan neih ang te chu result titha thei a nih loh thu leh heti chung chunga zirlai ten result tha tak an nei thin chu chhuanawm a tih thu a sawi bawk.


Mizo Zirlai Pawl (MZP) Hqrs. Serchhip in kumin a HSLC (pawl 10) leh HSSLC (pawl 12)-a Serchhip khawpui chhung zirna In hrang hranga tithate chawimawina hun nimin-a Serchhip Auditorium-a an buatsaih a hmanpuina ah he thu hi sawiin Serchhip bialtu MLA Lalduhoma chuan ‘Mizoram-ah sawrkar School result a tha lo’ tiin mawhpuh tur kan zawn thin thu a sawi a. Zirna leh hriselna chu ram changkang tehna atana hman thin niin ram changkang ah chuan hemi kawngah hian sum pawh an dah tam thin thu leh keini ramah chuan Zirna In te a building chhiain thawktute pawh Teaching Staff leh Non-Teaching Staff indaih lohvin zirtirna hmanrua te pawh indaihlo takin kan zir thin tih a sawi a. Serchhip-ah ngei pawh Govt. Serchhip College-a building thenkhat chu upa tawh tak tak leh sak that hun tawh te niin Brilliant HSS-a thawktute pawhin hun rei tak hlawh pawh an lak theih loh thin thu leh VC ten Zirtirtute hlawh tur an thawhkhawm thin thu a sawi a, “Tun Financial Year-ah hian MLA Fund pakhat mah a lo la chhuak lo a; a rawn chhuah hunah chuan MLA Fund atang pawhin engemaw zat thawh a ngai dawn a ni,” a ti bawk.


Serchhip bialtu MLA chuan kan Facility neih te hi result ti tha thei chi a ni lo tih sawiin, Sawrkar School-a thawk Zirtirtute pawhin an fate chu an thawhna School-ah kal tir duh lo tam tak an awm thu a sawi a. Heng harsatna hrang hrang karah Serchhip-a zirna In ten kumin a HSLC leh HSSLC Exam-a result tha tak an nei chu chhuanawm a tih thu sawiin, harsatna te hi sutkian duak duak theih ni lo mah se theihtawp chhuah zel turin he huna kalkhawm zirlaite chu a chah a, “In tumruh phawt chuan engkim a tih theih,” a ti a ni.

Zirna siamthat dan kawng a theih ang anga an ngaihtuah thu pawh Serchhip bialtu MLA chuan sawiin, thingtlang khua ah te khaw dang atanga thawk Zirtirtute tan Quarters sak a pawi-mawh thu te, English, Hindi leh Mizo tawng te inang tlanga Zirlaite'n thiam taka an hman theih turin zirna kalpui a tul thu leh hei hian zirlai ten Subject harsa an tih zirna kawngah pawh a puih theih dawn thu te, Moral Subject neiin kan nitin khawsak dan phung inzirtir thar a tul thu te, kan ram-in a mamawh Skill Development leh Entrepreneur lam hawi zawnga zirlaite chherchhuah a tul thu te a sawi a. Residential School pawh uar a tul thu sawiin, NABARD atanga sum tam tak kan puk te chu hemi kawngah hian hman tangkai a that thu leh kan hman dan erawh in duhthu a sam loh thu te a sawi bawk.


MZP Hqrs. Serchhip in nimin-a zirlai titha te chawimawina hun an buatsaih hi an Vice President R. Lalmalsawma chuan kaihruaiin he hun hi MZP General Hqrs. atangin General Secretary Jacob Lalmuanpuia leh a thawhpui ten an rawn hmanpui bawk a, he hunah hian kumin a HSLC leh HSSLC Exam result chhuaka Serchhip-a zirna In hrang hranga Distinction-a pass chin te hnenah chawimawina thuziak hlan an ni.

Nimin a chawimawina dawng te hi Marian H/S atangin zirlai 16, Goodwill English Academy atangin zirlai 10 leh Presbyterian English School Serchhip atangin zirlai 3 te niin heng bakah hian HSSLC-ah Govt. Higher Secondary School Serchhip atangin zirlai pakhat hnenah chawimawina hlan a ni a, Mizoram University in Under-Graduate result a tihchhuah a Govt. Serchhip College atanga Top 10-a lang mi pakhat leh HSLC Exam-a Serchhip atanga zirlai pass vekna, Goodwill English Academy te hnenah chawi-mawina hlan an ni bawk.

Comments

Popular News (Last 30 Days)

LPG man bithliah thar