Sawrkar hnathawk pawl ten sawrkar ngaichang mek

Sawrkar hnathawk inzawmkhawm pawl Federation of Mizoram Government Employees & Workers (FMGE&W) leh Federation of Mizoram Samagra Employees (FEMSE) chuan an thilphut chungchangah sawrkar an ngaichang mek tih an sawi.

Federation of Mizoram Government Employees & Workers chuan an DA (Dearness Allowances) 34% a tihpun ngiatin kar kalta khan Bagde dum an bel a. Mizoram sawrkar hnuaia sawrkar hnathawk te hian DA hi 28% an la mek a, DA pung hi hman thuai an phut a ni. FMGE&W hruaitute chuan DA pung an phut chu rules a inziak anih vang a ni tih sawiin, tunkar chhung hian an kal zel dan tur rel leh an tum tih a sawi bawk.

Hetihlai hian Federation of Mizoram Samgra Employees te chuan an hlawh tihpun chungchangah Vawiin hian Cabinet Meeting a awm dawn nia an hriat thu sawiin, an thuchhuak an ngaichang mek niin an sawi a. “June ni 10, 2022-a FEMSE khawmpui kan neihah Chief Minister in kan hlawh a pun ngei tur thu a sawi laiin Finance Department chuan min dang niin kan hria a. Cabinet an thukhawm dawn niin kan hria a, an thuchhuak a zirin Council Meeting neiin kan kal zel dan tur kan rel ang,” an ti bawk.