NH. 6 siam hna thawh mek Press mi ten an tlawh

Inrinni khan Aizawl-a Mizoram Journalist’ Association (MJA) member te chuan National Highway No. 6, Zemabawk leh Keifang inkara hnathawh mek chu enfiahin National Highway Infrastructure Development Corporation Ltd. ten kawng an sial mekah leivung paihna tura ruat 'Spoil Bank' ni lovah leivung an paih avangin Environment a chhe nasa tih Saitual DC chuan Press mite a hrilh.

Chanchinbumite hian Zemabawk dai atanga Keifang thleng kalin NHIDCL te kawng laih mek hi chipchiar takin an tlawh a. Leivung paihna tur hmun bik ruahman tur anih laiin kawng laitu te hian an remchanna hmun apiang ah leivung hi an paih nia an hriat thu an sawi a, hei hian thing leh mau tam tak a tihchhiat mai bakah lui te tam tak a hnawh bawk niin an sawi a ni.

Press mite hian Saitual DC VL. Hruaizela Khiangte pawh kawmin DC chuan leivung paihna tura ruat 'Spoil Bank' ni lova leivung an paih avangin Environment a chhe nasa tih a sawi a, “KM 2 dan velah Spoil Bnk hi kan ruahman vek chungin kawng laitute hian an remchanna hmun hmunah an paih mai niin a lang a. Spoil bank pawh hi a dawlna fel tak retaining wall siam tur anih laiin an siam lo a, hei hian nasa takin thil a tichhia a, sawiselna pawh a tam hle a. NHIDCL hian an hnuaia contractor te hi an control lo niin kan hria a ni,” a ti. DC chuan contractor te kawng laih dan a dik loh avangin mi 2 in nunna an chan tawh niin a sawi bawk.