PHE Department hmalakna in Serchhip-ah Tui thianghlim dan enfiahna tur building thar hawn a ni

PHE Serchhip WATSAN Division in Serchhip-a Tui thianghlim leh thianghlim loh enfiahna hmun, District Laboratory building thar an siam chu nimin khan PHE Department Jal Jeevan Mission (JJM) Project Management Unit (PMU) Director Er. C. Chawnghnuna chuan a hawng.


Jal Jeevan Mission (JJM) sum cheng nuai 11 hmangin he Laboratory hi Serchhip PHE Complex-ah siam niin Building hawnna puala Inkhawm PHE Serchhip WATSAN Division Office kawt-a neih ah Er. C. Chawnghnuna chuan sum tlemte hmanga sak building thar tha tak an nei chu lawmawm a tih thu leh thawktute inpekna, thawhrimna leh tanrualna nen lo chuan hetiang hi din theih nia a lan loh thu a sawi a. Building thar mai bakah hnathawhna tur bungrua tha tak tak ruahman nghal a ni chu lawmawm a tih thu a sawi bawk. Er. C. Chawnghnuna chuan PHE Department in mipuite hnena tui in tur an semchhuah te khawvel huap pawha a thianghlim tih pawm theih tura hma an lak thu sawiin, hemi atan hian NABL Accreditation neih a tul thu leh tunah hian Mizoram-ah State Referral Institute (SRI) chiah NABL Accreditation hmu a ni tih sawiin, District 8-a Laboratory te NABL Accreditation hmu thei tura hma an lak mek thu a sawi a. Serchhip-a Laboratory hawn thar ah hian hemi atana pawimawh bungrua te an nei kim thawkhat nia sawi bawkin, an Laboratory te chu a ropui vang ni lovin a pawimawh avanga hawng an nih thu a sawi bawk.


PHE District Laboratory hawnna hunah hian JJM Project Management Unit-a Project Manager Er. K. Zohmingliana chuan hun reilote chhunga Laboratory tha tak Serchhip in a nei thei chu lawmawm a tih thu leh Serchhip District tan thil pawimawh tak a nih thu a sawi a. Mihring te kan hrisel leh hrisel loh hriatna atan kan in test fo thin angin kan tui in turte pawh a thianghlim leh thianghlim loh hre turin test fo a tul thu leh PHE Department in tui sem tura an pump phei chu nitin test zel a nih thu a sawi a. Hei bakah hian Tuikhur tui leh tui kan hmuhna dang te pawh kum khat ah vawi 3 tal test tura beisei an ni tih sawiin, Tuikhur tui phei chu Bacteria avanga thianghlim lo thei a nih thu leh kum khat ah vawi 2 test in vawi khat hi chemical laka a thianghlim leh thianghlim loh enfiahna tur a nih thu a sawi a. He Laboratory hawn thar hian Serchhip bakah District chhung a huam tur thu sawiin, Building an mamawh em em laia building thar tha tak an nei ta chu lawmawm a tih thu leh hma an sawn zel a beisei thu a sawi.

Serchhip-a District Laboratory hawnna hun hi PHE Serchhip WATSAN Division-a Sr. Executive Engineer, Er. F. Lalsanglura chuan kaihruaiin tunhma lamin Laboratory hi an lo neih tawh thu leh a building a that tawk loh bakah a zim avangin harsatna an tawh thu a sawi a. Hei vang hian an Staff Quarters pakhat chu tizau-a siamthat anih hnuah hetiang hian ruahman a nih tak thu a sawi a, Er. Samuel LR. Ralte, Sr. SDO chuan lawmthu sawina hun a hmang bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man