Parliament Floor Leader thutkhawm ah tel

Parliament-a Floor Leader thutkhawm chu nimin khan New Delhi-ah neih niin Mizoram Lok Sabha MP C. Lalrosanga pawh a tel a ni.

Parliament-a Floor Leader thutkhawm nimin a neih ah hian Vawiin, July 18 a tan tur Parliament Fur (Monsoon Parliament) thutkhawm chhunga thu ngaihtuah turte thlirho a ni a. He thutkhawmna ah hian Mizoram Lok Sabha MP C. Lalrosanga chuan Bill 32 putluh tura ruahman te zingah Tribal-te hmakhua khawih, Forest Conservation Amendment Bill 2022 leh Wildlife Protection Amendment Bill 2021 te a ngaih pawimawh thu a sawi a. Mizoram mipuite tana pawi lo tur leh mipuite tana tha tur sawrkar Bill putluhte chu thlawp an tum thu pawh sawiin, Myanmar atanga raltlante hmakhaw chungchang pawh a sawi tel a. Aizawl atanga Assam Rifles sawnchhuah chungchang pawh Parliament-a auchhuahpui fo ngai tawh lo tura hmalakpui ah he thutkhawmna hotu Defence Minister Rajnath Singh a ngen a ni.

He thutkhawmna ah hian Defence Minister bakah Parliamentary Affairs Minister Pralhad Joshi, Rajya Sabha House Leader Piyush Goel leh Party hrang hrang atanga Floor Leader-te an tel a. Parliament Fur thutkhawm hi Vawiin, July ni 18 a tan tur niin thutkhawm neih chhung hian hnathawh ni, ni 17 chhung House pahnih te an thukhawm dawn a, he thutkhawm hi August ni 12, 2022 thleng awh tura ruahman a ni.